May titulo sa midnight appointment
May titulo sa pagkatuta
May titulo sa Ph.d
May titulo sa Bellagio
May titulo sa Burgundy
May titulo sa La Vista
May titulo sa McKinley
May titulo sa The Ayala Column
May titulo sa Spanish Bay Tower.

Kaming taga Hacienda Luisita
Kaming taga Brgy.Corazon de Jesus
Kaming taga Compostella Valley
Kaming tagahanga ni Katy Perry
Kaming extra sa The Bourne Legacy.

Tulirong napatunganga
Naglaway sa wala.

Ed Nelson R. Labao
30 Enero 2012

©2012 Kwentulang Marino
*imahen mula sa google

Nawindang ang
Itim na Nazareno

Dinaklot ng
Puta
ang harapang bahagi.
Walang naghumindig na burat.

Dinaklot ng
Mandurukot
ang tagilirang bahagi.
Walang tumunog na celfon.

Dinaklot ng
Adik
ang kabilang bahagi.
Walang umusok na bato.

Dinaklot ng
Batang-lansangan
ang likurang bahagi.
Walang nasinghot na pandikit.

Dinaklot ng
Manyak
ang puwitang bahagi.
Walang umiyak na manyika.

Hinimod ng
Aborsiyonista
ang duguang kanang kamay.
Walang nalasahang pait.

Hinimod ng
Tisiko
ang duguang kaliwang kamay.
Walang nalasahang reseta.

Hinimod ng
Bilanggo
ang duguang kanang kamay.
Walang nalasahang paglaya.

Hinimod ng
Magbubukid
ang duguang kaliwang paa.
Walang nalasahang titulo.

Hinimod ng
Manggagawa
ang duguang kanang paa.
Walang nalasahang panibagong kontrata.

Tinitigan ng mga
taga Iligan
ang maamong kaliwang mata.
Putik ang iniluha.

Tinitigan ng mga
taga Compostela Valley
ang maamong kanang mata.
Pumusyaw ang kumislap na ginto.

Nahibang ang tatlong milyon
Deboto.
Hindi sinagilahan ng takot sa bantang
Terorismo.

Alin na lang
lagariin ang Krusipiho
gupitin ang kulot na buhok
tagpasin ang pekeng ulo
roba ay gawing panyolito.

Kesehodang tawagin
mga buwang
na Panatiko.

Ed Nelson R. Labao
10 Enero 2012

© 2012 Kwentulang Marino
*imahe mula sa Abante Tonite

Siyudad ng Heidelberg
Atake ang nostalgia
Salag ay talinhaga.

18 Setyembre 2011

Kanser

Tinta at pluma’y lunas
Sa sakit na dinanas
Pinakayod sa dahas.

21 Setyembre 2011

Asendero

Usapin sa agraryo
Kay Rizal pang kuwento
Ngumisi ang pangulo.

21 Setyembre 2011

Prayle

Anino ni Damaso
nagtago sa abito,
bayan ay minumulto.

21 Setyembre 2011

Noli

Sa dayong Alemanya
nobela ay nilimbag.
Simbahan, binagabag.

21 Setyembre 2011

Ilog

Sa Ilog Rhine ay agos
na pumisig sa lagos
halik ng Ilog Pasig.

22 Setyembre 2011

Anak ng Kura

Pinantakot ang langit
Donya’y bumuka singit
Prayle, mata’y naningkit.

23 Setyembre 2011

Kura

Mabuti pa si Lolong
Kabusuga’y ‘sang linggo
Damaso’y naimpatso.

23 Setyembre 2011

Indulhensiya

Barya ay kumalansing
Sermon ay sumingasing
Bulong ang tumaginting.

23 Setyembre 2011

Sisi ni Sisa

Dayuhan ang bumaliw
Sa bayan kong ninakaw
Kalayaan at aliw.

23 Setyembre 2011

Fraulein

Babaeng Alemanya
Seryoso sa aralin
Dibdiban sa gawain.

18 Oktubre 2011

Alemanya

Makasaysayang ambag
Sa nobelang lagalag
Sa kanila nilimbag.

18 Oktubre 2011

Blumentritt

Malayo man sa kulay
Amigo namang tunay
Bigo’t saya’y kadamay.

20 Oktubre 2011

Ed Nelson R. Labao
©2011 Kwentulang Marino

*nagtangkang lumangoy sa katutubong tula na kung tawagin ay Diyona. Maaring amatuyurista pa ang nasabing tula. Inilahok sa isang patimpalak tulaan sa Facebook para sa ika-115 Anibersaryo ng Kamatayan ni Dr. Jose Rizal. Ang siste, naging ‘kontobersiyal’ ang nasabing patimpalak dahil marami ang kumuwestyon sa naging resulta. Ganunpaman, isang pagsisikap na mahandugan ang isa sa ‘Dakilang Pilipino’ na hindi nangiming ibuwis ang buhay.

Nakaka-istres ang Krismas na darating

saan ka pa hahanap ng preso
kumpas na atas ang kapritso.
Ang wis sa La Vista mag-PASKO.
Paglipad sa hawlang ospital
manhid na mukha’y naging sangmalmal.
Sipat sa oras
gurlis na leeg ay naligalig.
Tumangging sa segundamanong tutubi ay ilikas
taginting ng tubig ay pinalipas.
De pindot na kama ang hiling
lababo ay busisiin. Irog ang kasiping
celfon at laptop ay makutinting.
Kusinero, labandero pati na hardinero
direktora na dating manikurista ng palasyo
umaalulong na ‘amo’ ang paboritong bigkasin
abogadong betlog ay kayang pigtasin
kulang na lang istap ay tangkasin.

Kahabag-habag na mga matandang beteranong sakitin
aba’y ibig pa ng ‘little girl’ na inggitin.

Nakaka-istres ang Krismas na darating

Imbes na pundamental na isyu ang talakayin
kung tunay na Hacienda ay kayang libreng partihin
Ano’t Coke Zero ang patuloy na inamin.

Nakaka-istres ang Krismas na darating

kampuhan sa Mendiola ay ipinagkait
hibik ng bayan ay di marinig
wasiwas ng truncheon ay anong sakit
tarangkahan ng kalayaa’y nakapinid.

Nakaka-istres ang Krismas na darating

mabuti pa ang gobyerno
namudmod ng sampung libo.
Kaming nasa labas
hinimas ang lagkitang balbas.

Nakaka-istres ang Krismas na darating

Korona ng hinete ay nais tagpasin
kabilang ang numbra ng pitong kabayo.
Mainit sa paningin ng dugong asendero.

Nakaka-istres ang Krismas na darating

dumayo ang Kapuso na may dalang regalo
mayabang na Ho! Ho! Ho!
mula sa nakapulang sambalilo.
Nagitla ang mga batang Manobo.

Nakaka-istres ang Krismas na darating

nagmagaling ang Hari ng MMDA
may X’mas Lanes na maaring gamitin.
Motorcade ay naglandas sa likaw ng siyudad
humantong sa corner nang kalituhan
at kawalang masulingan.

Nakaka-istres ang Krismas na darating

magalang na sumakay sa dyip ang lalaki
sa hita ng pasahero’y inilaglag ang sobre.
Pangalan ni Hesus ang nakasulat.
Sir at Mam ang kumbinsing bigkas
pagtulong sa kapwa ang kanyang himok.
Tambutso ‘y nagbuga ng itim na usok
pumaspas ang takbo na may yamot.
Tinangay ng hangin ang kanyang alok.

Ed Nelson R. Labao
11 Disyembre 2011

©2011 Kwentulang Marino
*imahe mula sa google

Umagos ang malamig na Coca-Cola

sa mga nagbabagang bagang
sa mga nagpupuyos na lalamunan
sa mga lagablab ng galit
sa mga natigang na libog
sa mga kinuyom na hinampo
sa mga namighating okasyon
sa mga namaos na katahimikan.

Nagdudulot ng saya sa pananghalian
Masiglang sinasalubong sa bayanihan ni Juan
Kinikilala ang mga paalila’t palaboy
Lumalagok nang sangkatutak na handog.

Ano nga ba ang tunay na lasa?

sa mga pinaslang na unyonista
sa mga lumapot na pawis
sa mga pumaklang bukas
sa mga tinakam na sahod
sa mga sinaid na tubig imbakan
sa mga bumulwak na lason
sa mga winakwak na dayukdok.
.
Bihisan man ang sumpong ng Kaligayahan
Baguhin man ang timpla ng patalastas
Antigin man ang sentimentalistang walang lakas
Sa Gahamang laway ito magwawakas.

Ed Nelson R. Labao
4 Disyembre 2011

© 2011 Kwentulang Marino
*imahe mula sa sariling instalasyon

Ulsan

Nilango ng
maputing inuming
Soju.
Anghang ng
Kimchi
ang siyang nagpa-init
sa nanlalamig na
kalamnan,
habang binabagtas
ang nagmamalaking
daungan
at pagawaan
Hyundai.

Chiwan

Umakyat sa barko
ang sanrekwang
Opisyal na Tsino,
layun ang magsiyasat
sa dalang kargamento.
Kasabay nang pasabi
na manananghalian
ang pihikan grupo.

Sumagi sa kinalawang
na gunita.
Ang mga atas
ni Mao Zedong
na dati’y aking
dinadakila.

Belawan

Sakay ng
Pedyak
na animo
turista.
Kasabay sa
paghitit ng
Kretek,
sa kakaibang amoy
ng usok.
Lumutang ang isip
sa mga sinariwang
kuwento ni
Mochtar Lubis.
Kaguluhan sa
Jakarta
ay naganap na
sa tulang propesiya.

Ed Nelson R. Labao
17 Hulyo 2009

© 2011 Kwentulang Marino
*imahe mula sa Ulsan, Korea

Gamutin

ang may
malalang karamdaman.

Huwag gawing
entablado
ng kasinungalingan.

Huwag gawing
pahingahan.

Huwag gawing
kanlungan.

Huwag gawing
kulungan.

Wala ditong
lunas

sa mga taong
may

malalang kasalanan.

Ed Nelson R. Labao
20 Nobyembre 2011

(C) 2011 Kwentulang Marino
*imahe mula sa AP

Titigil nga ba ang dinagukang balakang?
Sa ginapas na palayan gumapang.
Mahapding init ng araw sa pasmadong karlit ng lilik
Tatlong kaban palay na pinamtubos sa bagong kilik.
Atungal ng duguang tiningkal sa Hacienda Luisita
Hanggang sa mababaw na tambak sa Maguindanao.

Titigil nga ba ang pataksil na buntal?
Sa kinalyong palad, winarat na bulsa
Sa walang habas na pagtaas ng gasolina.
Tangkang paglayas ng pamilyang kawatan
Sa Dominican Republic ang tangging hantungan.
Ganid na tubo’y sa Wall St. ang luklukan
Okupasyon ay patuloy ang dagok na laban.
Litanya ay hindi maampat sa akusang sandatang nukleyar
Nang gugumigil na upat
Salakayin ang Iran.
APEC ang umpukan doo’y muling iwinangwang
Dapurakin ang likas at lakas na iniyangyang.

Titigil nga ba ang nagsanga-sangang balitaktakan?
Sa kung sino ang tunay na tagumpay sa bakbakan.
Malikhaing isip ay kay yaman
Saganang umuusbong ng kulay.
Tumatalim pagsusuri’t katwiran
Sa bayan na ang tanging aliwan
Maging henyo sa tanghalian
Halalan ay isang peryaan
Larong basagang-bungo ni Pacman.

Ed Nelson R. Labao
13 Nobyembre 2011

*imahe mula sa google

sa mga lapidang walang pangalan
sa duguang lansangan ng Taft at Mendiola
sa binging tarangkahan ng Malacañang
sa makasim na hangin ng Hacienda Luisita
sa madilim na iskinita
sa pusalian ng istero.

Ipagtutulos kita

sa mga binuwag na piketlayn
sa nangarilang na tiningkal
sa binaklas na iskwater
sa nabubulok na bagaso
sa mga lihim na himpilan.

Ipagtutulos kita

sa mga batong itinumpok
sa mga bingit ng bangin
sa dambuhalang ugat ng puno
sa pampang ng ilog
sa kubling guwang
sa maburak na laot.

Ipagtutulos kita

sa siyudad ng tirano
sa konsensiya ng NATO
sa pusod ng Wall St.
sa mga ganid na korporasyon.

Ipagtutulos kita

ng himno’t talinhaga
ng kuwento’t dula
ng martsa’t sigaw
ng krus na bala
NG ULOS NG ITAK!

Ed Nelson R. Labao
31 Oktubre 2011

imahe mula sa Google