Sinumang Dayo
(Sa Ika-117 Taong Gunita ng Kalayaan)
Sinumang dayo
ang sa baya’y lumupig
lagi’t lagi kaming tumitindig
Espanya, Inglatera, Amerika at Hapon
kahit na nga si Limahong ay aming itinaboy
Anu’t itong Tsina
sakop naming karagatan
mga umbok na bato’t lupa
ay kanilang tinambakan
gusali’t paliparan
ay kanilang tinayuan
kabayan kong mga mangingisda
tila mga batang ipagtabuyan
sa kalbong pamunuan
may bantang iniwan
Nalimot na nga ang dating
simulaing ipinaglaban
palayain ang bawat bansa
sa kuko ng imperyalistang hibang
kapangyarihan sa kabuhaya’t armas
yabang na ipinandarahas
sosyal-imperyalista na nga ba
turing na dapat sa higanteng Tsina?
Mayaman ang aming bayan
sa aral ng dakilang kasaysayan
aming ninuno’y lubusang nanindigan
sa mga mananakop na imbing sukaban
nanangan sa dumaloy na giting at tapang
dugo ma’t buhay ay handang ihain
dayuhan nangaduwag nang ito’y palayasin
Sinumang dayo
maging kanluraning Amerikano o asyanong Tsino
kung ang layun ay tuso
hindi kami pasisino!
Emanzky88
12 Hunyo 2015
2:30 n.u
Ang TANduay ni Lucio
ay mahigit na ‘sang sentenaryo
na gumagawa ng Agua de Pataranta
pag-aari’y dumaan sa iilan pamilya
Menchatorre, Elizalde, Yrissary, Ynchausti at Teus
sa huli,
kontrol ng empresa sa kanya natapos
Ang TANduay ni Lucio
ay nagmula sa katas na tubo
hinaluan ng kinatas na lakas
ng mga binusabos na obrero
Ang TANduay ni Lucio
ay nagmula sa katas ng tubo
katas na katas
ang mga inagawan ng lakas
pigang-piga
ang sektor ng paggawa
Ang TANduay ni Lucio
gustung-gusto itong inumin ng mga dayo
sa paniwalang hindi sintetiko
anunsyong buladas na bumulag
produktong lumikha ang kalagaya’y hungkag
ikinubling pormula ang tunay na nagpasarap
Gumamit ng gintong jigger
i-mix ang mga sumusunod;
mahigit ‘sang dekadang pinaasa
pinilipit na pasahod
pinagkait na benepisyo
mga nilangong pangako
mga binusalang bibig
mga binuwag na kapit-bisig
Ang TANduay ni Lucio
ay tunay na nakalalasing
lumalasing sa kapitalistang lasenggero
lumalasing sa iilan angkan
lumalasing sa kapangyarihan
lumalasing sa pagkagahaman
Ang TANduay ni Lucio
itagay man nang itagay
ang kakarampot na patak ng rhum
haluan man ng matamis na cola
sa mga dinustang manggagawa
papait at papait ang panlasa
sa inihalong PAGSASAMANTALA!
Emanzky88
7 Hunyo 2015
©2015 Kwentulang Marino
*imahen mula sa bulatlat.com
Kwentulang Marino 