Hero Worship

1

Nag istrol

sa

Trinoma

si

Mabini

hindi

nasiyahan ay lumipat

sa

SM City

Gustong kumaing

ni

Marcelo H. del Pilar

sa

Mc Donald’s

may padalang alawans

ang kanyang anak

Tumangging sumama

si

Dr. Jose Rizal

mas gusto niya

sa

Jollibee

langhap pinoy kasi

Buong

giliw na ipinagmalaki

ni

Mariano Ponce

sa bayang

Baliuag

ay may katatayu lang

na

SM City

Reklamo

ni

Andres Bonifacio

ay hindi man lang maalayan

ang kanyang

rebulto

Sabad

ni

Felipe “Apo Ipe” Salvador

mabuti pa nga kayo

apo ko na ang naging mayor

dito

kahit kapirasong

monumento

ay walang naitayo

sa

ngalan

ko

2

Gumimik

ang mga

ilustrado

sa pamumuno

ni

Aguinaldo

niyabangan ang mga

propagandista at rebolusyunaryo

sa

fastfood lang daw

kayang

kumain ng mga ito

sa

mamahaling

restawran

na

Le Cirque

ang pasiklab

ng

grupo

kabuntot si Paterno Quezon Laurel

at

Roxas

Sa dami ng nakaing

Caviar

malaki ang kanilang

babayaran

Huwag kayong matigagal

sigaw nitong

si

Macapagal

magkano ba ang

suma-tutal?

beynte mil dolyares

lang naman

buong pagmamalaking

binayaran

3

Gran aybol ang tropa

pinaghalong rebolusyunaryo repormista elitista

Naaliw

sa ibat-ibang nakita

maraming ngumangawa sa

kalsada

patay na pala

si

Michael Jackson Francis Magalona

Bakit

lumulutang ang kulay dilaw

sa

Ayala

tanong

ni

Ninoy

sa mga kasama

Sagot

ni

Diokno

sa kulungan ay kanyang

kakosa

Libing

ni

Cory

na iyong asawa

Ganyan lang ang mga

pinoy

sa una

bukas makalawa ay wala na

Sumaya

ang mga indiyo at ilustrado sa

ibat-ibang

anunsyo

sumayaw at kumanta

si

Buboy Syjuco

ng

TESDA

nabigyang buhay

ang

apelyido

ni

TEODORO

tigapag alaga

lang

pala ng baboy

si

Binay

naawa sila sa

bubungang

butas na bahay

ni

Villar

ipinakita namang

PUNO

ay walang bunga

kahit ni isang bubot na

mangga

napailing

si

Manuel Roxas

sa pagsikad ng trayk

ng kanyang

apong

si

Mar Roxas

tumakbo nang matulin

si

Erap

salamat sa gamot

na

Arthro

hindi naman sila nakaligtas

sa sermon

ni

Miriam Santiago

4

Eksposyur tayo sa

BASECO

ang kayag

ni

Lean Alejandro

tumango lang sina

Jopson Beltran Olalia

tinanong

ang masa

kung payag na sumawsaw

si

Satur at Casiño

sa

Nacionalista

buweltang

sagot sa kanila

bakit

wala bang sariling

partido

ang

kilusang masa?

sino

ang kilala ninyong

mga

bayani?

(may gantimpala kayong nakatabi!)

Lucky Me Noodles 3 in 1 Nescafe UFC Sarsarap Ulam king

Lotto ticket Nokia Celfon Unli Text

Trip to Boracay

BAYANI?

GMA FG Garci Abalos Neri Ermita Remonde Claudio

Bolante Mancao Romualdez Suarez

CBCP El Shaddai Ombudsman AFP VFA

Senado Kongreso COMELEC

Darna Rosalinda Hayden Kho Revillame

Eat Bulaga Wowowee Payaso EDSA People Power

ZTE Stocks Cha-Cha Con-Ass

Steak Red Wine Caviar Astoria

BAYANI?

pasensya na po

hindi

naming talaga kayo

kilala

madali kayong

mawala

sa aming

memorya.

Emanzky88

28 Agosto 2009

*** Nalathala sa antolohiyang IPUIPO SA PIGING (2010)

 

Anata Wa Firipinjin Desu Ka?

(Ikaw Ba Ay Pilipino?)

Nakita ko sa news ang mag-asawang pinoy na pina-deport mula sa Japan. Bakas sa mukha nila, Arlan Calderon, 36 at kanyang kabiyak na si Sarah, 38 ang matinding kalungkutan sa pagkahiwalay nila sa anak na si Noriko, 13 na ipinasyang bigyan pagkakataon ng gobyernong maiwan at makapanirahan sa Japan.

Malaking bilang ng mga turista sa Cairns, Australia ay mula sa Japan. Oktubre, 1993 nang madaong ang aming barkong M/V Maaslot-L. Namasyal kami ni Rolly, isang kasamahan seaman. May kasingkitan ang kanyang mga mata at ako naman ay may kaputian kaya’t napagkamalan kaming Hapon nung saleslady sa isang shopping mall.

Nung sumunod na araw, isang pinay na madre na bolunteer ng Stella Maris
ang nag-anyaya sa aming mamamasyal at magsimba. Sr.Carmelita ang kanyang pangalan tubong Laguna. Pagmamalaking kwento namin, kami’y napagkamalan mga Hapon. Sumagot s’yang mukhang proud pa kami, partikular na ako ang kanyang tinutukoy. Nakuha ko ‘yun mensahe nya. Nakaramdam ako nang matiding hiya sa akin sarili. Sa tingin ko’y di lang masabi ni Sr.Carmelita na mas gusto ko pa atang masabihan maging Hapon kesa ipagmalaking ako’y Pinoy.

Ang hindi lang n’ya alam, ‘yung unang barkong sinampahan ko’y naka-plano kong mag-jumpship sa oras na dumikit ang barko sa puerto, kaso angkorahe kami sa laot kaya’t ‘yung Japanese dictionary na dadalin ko’y napurnada. Ewan ko ba kung bakit may kakaibang karisma ang Japan at kultura nila sa akin, pangarap ko pa ngang makapag-asawa ng Haponesa, lahat ng ito’y naisantabi ng ako’y makapag-asawa’t magkaanak na. Marahil batbat ako ng adbenturismo
nu’ng panahon ako’y binata pa.

Kanina nakita ko sa news ang mag-asawang pinoy na pina-deport mula sa Japan. Bakas sa mukha nila, Arlan Calderon, 36 at kanyang kabiyak na si Sarah, 38 ang matinding kalungkutan sa pagkahiwalay nila sa anak na si Noriko, 13 na ipinasyang bigyan pagkakataon ng gobyernong maiwan at makapanirahan sa Japan.

Bago pa man ‘yun, nakibalita na ako sa kumpare kong Ariel na pabalik-balik sa Japan. Kwento n’ya, mahigit 15 taon ng naninirahan sa Japan, katayuan ay iligal.Kabutihan palad ang kanilang anak na babae ay narehistro bilang citizen. “Problema lang kasi pare gumamit sila ng ibang pangalan.” Hindi man n’ya naipaliwanag ng malalim, paano bibigyan ng pagkakataon manatili sa Japan ang mag-asawa sa una pa lang ay labag na ang kanilang ginawa. Sa tingin ko’y maging precedent sa iba pang may kamukhang kaso kung pagbibigyang ng gobyerno at ito’y kanilang ikinatatakot. ‘Yun nga lang pagbibigay tsansang makapanirahan si Noriko at hindi isinamang pina-deport ay isang pagbubukas ng pinto at bentahe sa mga batang ipinanganak na may kahalintulad na kaso.

Ganunpaman, malaking kyuryusidad at palaisipan pa rin sa isang sulok ng isip kong hindi maisantabi. Sa NAIA pa lang ay hindi maiiwasan “magtaas ng kilay” ang mga nakasubaybay kung bakit mga taga NHK o Japanese media lang ang sinagot ni Arlan dagdag pa sa news ay kahirapan magsalita ng lenggwahe natin. Imagine sa mahigit na 15 taon n’yang paninirahan sa Japan ay nalimutan na n’ya ang wika natin? Kinikiliti ako ng mga katanungan na gaya rin ba sya ng mga kilala nating napunta sa U.S, U.K ang nagpalit ng pangalan, ugali at diksyon ng pananalita? Nagpa-asimila na kaya s’yang tuluyan? May intensyon ba s’yang burahin ang kanyang nakaraan? Tulak ba ng kahirapan sa pinas? kawalan pag-asa? pagka-bangkarote ng bansa sa larangan ng ekonomiya, pulitika at moral na aspeto ng lipunang Pilipino?

Kung masasabi lang n’yang ‘wag ninyo kong husgahan. “Kung bakit hindi sanay magsalita ng lenggwaheng pinoy ang akin anak, kung bakit ganito akong kumilos, manalita na higit pa sa isang tunay na Hapon. Makapag-mamalaki ba akong pinoy kung ang bayan ko’y tinagurian ng ibat-ibang di magandang pangalan “bansa ng mga alipin”, kasama sa mga listahan ng mga ganid at mandarambong, nagugutom, korap, paalila? Magagawa ba ng mga pinoy ang magpatiwakal kapag nakataya na ang integridad at kahihiyan ng kanilang sarili, pamilya at bansa? Sa Japan nakikita kong katiyakan ng aming mga pangarap at kinabukasan!”

Marahil bigyan natin s’ya ng pagkakataong magnilay. Sa yugtong ito’y napakabigat ng kanilang kinakaharap na krisis. Mga taon kanilang pinagsikapan bumuo ng mga pangarap, magiging sukli ay pagkawalay sa kanilang pinakamamahal na anak.

Hindi sasapat ang mga matatamis na salita’t talinhaga. Gayunpaman, iginawa ko kayo ng isang tula…

MALUNGKOT NA PAMUMUKADKAD NG SAKURA*
Kay Noriko

Hindi
ako
mapasasaya
ng
pamumukadkad
ng
Cherry
sa siyudad
ng
Kyoto.

Wala
nang
mahika
ang
klasikang
pagtatanghal
ng
mga
geisha.

Anong
saysay
pa
ng
ritwal
na
Chanoyu.

marahil

ngayon
buwan
ng
Abril

ang
pinaka
malungkot
na
sandaling
masilayan
ang
mga
bulaklak
ng

Sakura.

kasabay
ng
aming

pamamaalam.

Emanzky88
14 Abril 2009

(c) 2009

* Napabilang ang tulang ito sa ANI 35 CCP (2009) The Pinoy As Asian. Nalathala sa antolohiyang IPUIPO SA PIGING (2010)

 

Dalawang Mukha Ng Diyos

Makapangyarihan!
tunay
na
makapangyarihan
ang diyos nila
David Ben-Gurion
Golda Meir,
Ehud Olmert
Mossad
at ng mga
Zionistang
tagasunod.

Makapangyarihan!
tunay
na
makapangyarihan
ang diyos ng mga
tropang Israeli.

Kayang lumipol
ng pambansang
pagkikilanlan.

Kayang dumurog
ng moske
ospital,
iskwelahan
tahanan,
palaruan
pati
pangarap
ng mga
batang Palestino.

Makapangyarihan!
tunay
na
makapangyarihan
ang diyos nila
Bush
Obama
Rice
CIA
Pentagon
ng mga
Industriyalistang pangkatin,
ng UN
EU
G-11,
mga pinuno
ng bansang
tagasunod nito,
kayang magbulag-bulagan
manahimik
tumango,
umindak
sumamba.

Marahil
ang
tanging diyos
ng mga
Palestino
ay
ang diyos
ng
katotohanan.

Emanzky88
Former crew Clipperventure-L
7 Enero 2009

*Nalathala sa antolohiyang IPUIPO SA PIGING (2010)

 

Dazvedanya (Sa Mga Kinalawang Na Maso At Karet)

I

Pinupuri ng matandang
babaeng- bugaw
si
Stalin
sa malasakit na ginawa
ng estado.
ang glastnost at
perestroika’y
ang kalayaan
naman
niyang itago
ang mga
puta,
sa madidilim
na sulok nang
naglalakihang
bato.

II

Ang dati- rating kwartel
ng partido’y
naging aliwan
ng mga magigiliw na
marino.
nalulunod sa patak ng
vodka
masaya, maingay
sa hindi
mawawaang
lenggwahe at
musikang
umaalingawngaw
sa mga matataas at makapal na pader
nang nakaraan.

III

Hinahalungkat ni
Alexander
ang hindi na binasang
libro
obra ng mga dakilang
proletaryo.
ipinagpalit ang lumang mukha ng tsar,
yabang na karangalan
at litrato ng angkan.
inuungkat ang idinidiktang
patakaran
sinasalungat ang agos ng
kalakaran,
sistemang nakatago sa kanyang
lumang bodega ng
kasaysayan.
kapalit ng mga
kwento,
mga kwento nang
pagka-
diskontento.

IV

Wala nang makathang
tula si
Pushkin

Wala ng malikhang
kwento si
Gorky.

Wala ng umusbong pa
na bagong
teyorya at praktika si
Trotsky.

Pinagpistahan ng mga
musmos na
usyoso,
nakapaskil na nilaong
dyaryo
lihim na dokumento
at manipesto ng organo
pati na, ang tiklado
ng makinilyang
pinipi
nang mga tanyag
at henyo.

V

Sintonado
ang tugtog na awiting
INTERNASYUNAL,
sa tipa nang
minanhid
na daliri ng matandang
musikero.
lakad ay nagpagewang- gewang
ang alon ng
akordiyon ay lasing na
sining
na pasuray- suray.

Masansang na amoy ng
batang- lansangan,
nakatanghod sa tapat ng
tindahan pabangong-
Calvin Klein,
kapatak na halimuyak
sa kanila’y
ipinagsungit.
higit na kumapit
sa balat
ang umaalimbukal na
anghit.

Sa makitid na kwadradong larangan
may hatid na kirot
ang ginaw.
pilit binibigyang kulay ni
Viktor Novotny,
mga kwadrong humihiyaw
hapis na mukha, matang
inagawan
nang kawalang
linaw.

VI

Asta silang pasugod
sigaw nila’y walang patid,
walang pagod.
mahigpit na kapit- bisig,
nanginginig na hawak
ay kinalawang
na maso at karet.
nanlilisik ang tingin
ng matandang kalbo
taas- noo na ibinabandila ang isang
libro,
may panunumbat ang mga rebulto
masahol pa sa matinding puna
ng kolektibo.
gustong ikuti, ipagsigawan
ang awit na
sintonado
ay minsan sa aking
buhay….
inawit nang may kulay,
may ningning ang bawat
tono.

Emanzky88
M/V Akra Sounion
Odessa, Ukraine
7 Oktubre 1998

* Kabilang sa antolohiyang IPUIPO SA PIGING (2010)

 

Dapithapon Sa Ensenada

Binibilang ang mga kahon na nagdaan
hindi alintana ang mga bugang usok
na higit nagpadilim sa mga gunita.

Pitong guhit sa noo’y
aninag nang panglaw,
tanging kahol ng aso
ang galak na kasama.
Sa limos ni Menem
laging nakaasa.

Tipid ang kwentong
ipinadpad nang ikalawang giyera.
May sumaging kirot
sa tanong na gulo
sa nahating
Yugoslavia.

Patawarin sa kinuyom na duda
tunay na pinagmulan ay bayang
Alemanya.
Inampon ng kapwa diktadura
lagim ng kahapon ay ikinubli
sa Argentina!

Emanzky88
M/V Clipperventure-L
2 Nobyembre 1992

© 2008 Kwentulang Marino

*Kabilang sa antolohiyang IPUIPO SA PIGING (2010)
imahe flickr.com daniel2005
**rebisyon 13 Setyembre 2012

 

Salungat Sa Agos (Sa Manlalayag)

Iskata’t malaka’y hindi dasal
na laging inuusal
kahit kami’y pagal.
hindi isang sayaw ang bulyaw
na sa bawat naisin
sa trabaho’y nakakubabaw
tinungkab mantikang tumigas
kaulayaw sa beynte dos oras
tanging hiling, higaa’y makapiling.
pritong daing huwag laitin
igaya sa amoy rasistang kambing.
hindi diniyos itong dolyar.
tulak ng kahirapan
kaya nangibang bayan.
salungat sa agos pagbalikwas
hudyat ng tsunami ang kawangis.
lilisan, hindi talunan
babalik sa dating larangan!

Emanzky88
MV Clipperventure-L
St. Eustatius, West Indies
19 Marso 1993

© 2008 Kwentulang Marino

*Unang Nalathala sa Parola 1994
at Ani 23 Culutural Center of the Philippines (1996). Kabilang
sa antolohiyang IPUIPO SA PIGING (2010)

_________________________________________
imahe news.yahoo

 

Takas Sa Hunyo

Inilipad ng hangin, mabigat
na damdamin
habang ginugunita, huwad
na kasarinlan:

pinay, humalik sa papaalis
na sakang
luha sa kinse – anyos
na dalagita’y nangilid
tutungo sa bayang
lapad ang sisikatan.

pamilya’y tumunganga sa anak
na paalila
kinodakan ang malungkot na mata
hindi alam kung saan pupunta.

asawa’y iiwan, nakatanaw
sa kawalan.
magsing-irog, walang katapusang
pagpapaalaman.

matanda’y pinamaypay ang visa
niyang tangan.

nilaro ng ulap
kahirapang iniwan.

Emanzky88
Philippine Airlines
Himpapawid
12 Hunyo 1992

© 2008 Kwentulang Marino

*Unang nalathala sa Parola
at Ani 23 (Cultural Center of the Philippines)
December 1996. Kabilang sa antolohiyang IPUIPO SA PIGING (2010)