Kwentulang Marino

Nalulunod ako sa dumarating na unos
sa aming buhay.
Parang nabigong pag-ibig
na mahirap malimutan.
Dalawang taon pa lang nakalipas
si Ondoy,
si Pedring,
matinding hangin ang dumating.
Inilubog
Bayan ng San Miguel
Bayan ng Calumpit
Bayan ng Hagonoy.

Bukas!
may panibagong hambalos
…si Noy.
Hindi si Quiel.

Kulimbat ng 12% VAT
sa haywey.

Emanzky88
30 Setyembre 2011

© 2011 Kwentulang Marino

Isinuka ang mga basurang ibinalibag sa romantikong lawa. Mayabang na
namasyal sa Baywalk. Sinudsod
ang nagdikit na tisa na animo pamato
ng mga batang lansangan. Sumilip
sa MOA. Nagkape sa
Sofitel Hotel. Tinadyakan
si Lacson nang walang kalaban-laban. Pinagwagwagan ang
nagharimunan pedicab. Ininggit
ang pumait na visa ni Uncle Sam. Ngumuyngoy ang
mga paslit sa naputikang laruan. Tinakaw
ang magsing-irog sa palubog na araw. Kumunat
sa walang puknat na hangin ang chicharong espesyal. Namutla
ang tumabang na pastilyas sa San Miguel, Bulacan. Selos
sa Emperador, sa Tsunami ang kalampag ng mga natungkab
na yero sa abuloy ni Noy. Pinulikat
ang sentido ni Soliman at mga Senador. Unos na
nagbalitaktakan sa hagupit ng panahon.

Ed Nelson R. Labao
29 Setyembre 2011

*imahe mula sa google

“The chairman, vice chairman, and senior legal counsel of the 9/11 Commission wrote books partially disassociating themselves from the commission’s report. They said that the Bush administration put obstacles in their path, that information was withheld from them….”

– Dr. Paul Craig Roberts
Centre for Research on Globalization

Isang dekada na tayong
nagluluksa.
Natagpuan na sa buhangin
ang katotohanan.
Binusalan nila ang mga
paham.
Mga buktot sa pagdinig
ay nangabahag ang buntot.
Inilibing sa pusod ng alon
ang lobo ng disyerto.
Mapanlinlang ang hintuturo
sa kanya’y nakaturo.
Maligoy ang mga
talumpati.
Gayun ang mga lumikha’t umaruga
ay nakangising gumagala.

Emanzky88
11 Setyembre 2011

© 2011 Kwentulang Marino

*imahe mula sa wikipedia

Ang tanong po niya. Kung hindi ko siya kilala…

– Ricardo Bonayog
Guwardiya
UP-Ayala Land Technohub

Magbibigay pugay ako
sa dumarating na aroganteng kotse. Pipiliting
isaludo ang nanginginig na bisig. Iluluhod
ang nangingiking tuhod. Magpapatirapa
na animo sumasamba. Yuyukod
ang nangangawit na batok. Mananahimik
ang pinilantik na dila. Ibabaling
ang naduwag na mata sa mayabang na plaka. Matatas
na uusalin ang katagang Porsche. Tampal sa
noo na kambal na marangyang sasakyan
sa palasyo. Pilak na
sumisilaw sa nilibak na batuta. Buong buhay
kong kakabisahin ang palalong numero. Walang puwang
ang pagdalaw ng hikab. Umula’t umaraw
patuloy na hihimasin ang gatilyo. Bigwas na
ipalalamon ang mga batas
na binalangkas. Pakiramdaman ang bugang
galit sa gulong ng kapangyarihan. Matayog na
paghatol ay ma-otso.

Emanzky88
6 Setyembre 2011

© 2011 Kwentulang Marino

*imahe mula sa google

 

Dati
(Pasintabi sa lovelife ng Pangulo)

Kumakain tayong pinoy
ng Regular
naging Light
ngayon, tila ba Zero.

Ikinahihiya ang ulam
kung tuyong dilis
naging galunggong
ngayo’y bumabahang noodles.

Tirang pagkain sa restoran
sa basura ay tinatapon
ngayo’y pinapagpag
muling nilalamon.

Sa garapon ang binibiling
Nescafe
naging baso’t 3 in 1 sachet
ngayo’y humihilab ang tiyan. Bulsa ay
kinakabagan.

Mayabang na hinihitit ay Marlboro
naging Hope ni Lucio
ngayo’y nauwi sa
Winnsboro.

Tinatagay ay San Mig Pilsen. Brandy ay
Fundador
ngayo’y matabang na Colt
at mumurahing
Emperador.

Kababaihan ang nasa
tahanan
ngayon
Kalalakihan ang nasa
labahan.

Guro ang dala
ay lesson plan
iginagalang
at hinahangaan
ngayo’y bitbit ay droga
sa ibayong dagat
dinudusta.

Trabaho ay regular
kahit saa’y umaapaw
naging arawan
at kontraktuwal
ngayo’y sanlaksang kawal
ng mga tambay.

OFW pananabik ang agad
ay makabalik
ngayo’y nais bumabad
manatili sa dayong hidwaan.
Kahindik-hindik ang mamatay
nang dilat sa sariling bayan.

Tsina ay nililibak
tinatawanan
damit ay iisang korte
iisang kulay
ngayo’y sinasamba
at inuutangan.

Presidente ay diktador
naging tomador
at babaeng mandarambong
ngayo’y bihasang komikero’t alaskador.

Emanzky88
2 Setyembre 2011

© 2011 Kwentulang Marino

*imahe mula sa gmanews.tv