Kwentulang Marino

“Madalas din ba kayong pumunta sa mga peryaan o karnabal? Siguro hindi kayo takot sa mga payaso…”

Kalimitan na sa mga educational o field trip sa mga bata ang pumunta sa Star City kabilang na ang aking mga anak.

Mga sampung taon pa lang ako ng maka-experience masakay sa tsubibo, sa amin kalimitan; pag sinabing tsubibo e mga sasakyan sa perya na umiikot na pwede kang mahilo pangunahin ‘yun octopus, ‘yun ferris wheel, tawag namin ay ruweda.

Malulain o madali akong mauyot, yun bang pag nasa ituktok ka’t tumingin ka sa ibaba eh para kang mahuhulog agad, pwede kang mahilo.

Kaya kahit pwede kong i-promote ng isang kapitan na mabait sa akin e tumanggi ako sa kanyang alok. Hindi ako sanay mamintura sa mga gilid o matataas na lugar sa barko.Kaya nagkasya na lang ako sa trabahong pang kusina. Pero sa alon malakas naman ako.siguro dahil kalakasan ko nun uminom kaya hindi ako natatalo ng hilo ‘wag lang patutulayin ako sa mataas at titingin sa ibaba na laluna’t walang hahawakan.

Habang pinagmamasdan ko ‘yun mga piktyur ng mga anak ko sa Star City kasabay naman ang nagsusulputang balita.andyan na ang kaso sa Legacy, pwera pa ang dating isyu sa CAP at iba pang pre-need o insurance company, bangko na nagsara o nabangkrap. Sabi nga ng pinsan kong nasa U.S eh wala naman napaparusahan o nabibilanggo. Sa kaso nga ng AIG , mother company ng Phil-Am Life eh sya pang tinulungan ng gobyerno. Masakit pa nito sa mamamayan kinukuha ang pagsasalba sa mga malalaking negosyante. Nakaka dismaya pa eh nagpasarap pang mga taga-AIG. Ganito rin ang kaso sa pinas nagmamakaawa ang mga magulang sa mga nang walanghiya sa kanila. Napakalambot ng pagtrato ng SEC, pahabol pa niya.

Sa kaso ng iskandalong kinapalooban ni Katrina Halili at Hayden Kho, bago pa man ‘yan, maraming ng kumakalat na sex scandal sa celfon at You Tube, di ba’t meron pa ngang na Imbestigador. Ngayon pumutok ito ay “in aid of legislation” ang mga magagaling na mambabatas at politiko. Parang piyesta sa Senado habang ginigisa ang dalawang nasasangkot. Kabi-kabila ang pag reyd sa mga nagbebenta ng DVD. Kapapalabas lang sa Case Unclosed- paksang pidopilya hanggang ngayon ay wala pa palang naipapasang batas kundi man ay ma-amyendahan, para maparusahan ang mga gumagawa ng pang aabuso sa mga batang wala pa sa hustong edad.

May lumubog na naman ferry boat at marami ang namatay. Nag imbestiga na naman ang MARINA, pinakilos ang Coast Guard, ipinatawag ang may ari ng Ilagan Shipping Co Gumana na naman ang Board of Marine Inquiry.

Dumaing ang mga teacher na kulang ang kanilang mga classroom sa darating na pasukan. Pati ang pinagdadausan ng flag ceremony ay kinombert para pag-klasihan.Tumulo ang patak ng ulan sa kisame. Hindi tinanggap ng titser sa utos ng kanyang prinsipal ang isang batang babae sa grade one dahil hindi sanay bumasa.

Nag-gigirian ang mga mambabatas sa cha-cha, imbestigasyon sa senado sa pagitan ng pangkat ni Lacson laban kay Villar sa isyu ng kurakutan.

Nangisi lang si Jun Lozada at pa-joke lang si Jocjoc Bolante presto-abswelto! Inalalayan ng mga madre ang bagong whistleblower na si Lt.Nancy Gadian.

Nag-merge na ang Lakas-Kampi-CMD para sa 2010. Nakita na sa news ang mga mukha ng posibleng kandidato.

Hindi naman daw ganun kapanganib ang H1N1 Virus kumpara sa mga naunang kumalat na sakit sabi sa balita.

Patapos na ang balita, minasdan ko uling mabuti ang litrato ng dalawa kong tsikiting. Siyang- siya sila na piniktyuran sa isang ride.

Tanong ko lang. Kayo? Madalas din ba kayong pumunta sa mga peryaan o karnabal? Siguro hindi kayo takot sa mga payaso. Hindi rin siguro kayo takot sumakay sa mga tsubibo. Ako ba kamo? habang sinusulat ko kasi ang draft nito eh kung bakit naisipan kong umakyat sa isang mataas na lugar, heto’t medyo nahihilo, heto’t sumusuka na ko.

“Kapag hindi ka napuruhan ng hiwa ni Tata Pampeng eh tiyak ay umaatikabong kantyawan, sa dahilan maganit na ang sa iyong..”

Kailangan lang ay blue card na babayaran mo sa halagang singkwenta pesos. May sarili kang dalang gasa, betadine o kung gusto mo naman sa parmasya ka na lang bibili, sa kanila na yung pampamanhid na iiniksyun ng doktor-presto natuli na yung anak mo, pagmamalaking ibinalita sa akin ni misis.

Iyon nga lang may bayad na rin kung tutuusin, lahat-lahat eh umabot ng anim na raan kasama na ang iba pang antibiotic na binili niya sa nasabing district hospital sa aming probinsya. May himig nang panghihinayang ke misis.

Huwag ka ng magtaka, kahit sa goverment hospital gagastus ka na rin, pina-privatized na rin ngayun ang mga ospital ng gobyerno, wala daw budget, gaya lang ng sa DepEd ‘yan, alang budget sa classroom at iba pang gamit pero may budget sa noodles, matiyaga kong paliwanag.

Basta’t pag sa bakuna ng bata hangga’t maari eh sa pribadong klinika ka pumunta, alam mo naman ang mga lumalabas sa balita sa mga stock ng gamot ng DOH, pahabol kong sabi.

Natutuwa naman ako ke misis at iiniisip niya ang pagtitipid o pag babadyet ng pera dahil sa nangyayari sa ating kabuhayan.

Sabi nga ng iba, me mga bagay o pangyayari na hindi mo na pwede uling madaanan o mabalikan. Sa kultura nating mga pinoy kapag hindi ka natuli, ikaw ang tampulan ng tuksuhan ng mga kapanabayan mo, kantyaw lagi sa iyo’y “supot”,” mutain ang magigiging anak mo” at kung hindi ka pa natutuli eh pilit kang lalayo o iipitin mo ‘yun uten para itago sa kasabay mong dyumidyingel, kahit di sabihin ng ‘yun kasabayan ay para bang pagmamalaking naghuhumiyaw hoy tuli na ko!
Lagi-lagi ang pangamba kung matuklasan nilang hndi ka pa tuli.

Malaki na ang pagbabago kahit sa paraan ng pagtutuli, sa aming probinsya kapag handa kang magpatuli hintayin mo lang ang bakasyun o summer at paabisuhan lang ninyo si Tata Pampeng na marami-rami din bilang kayong magpapatuli eh magkita-kita na lang sa tinatawag na pulo, pipila at ngunguya ka ng usbong ng bayabas at handa mong tiisin ang hatol ng kanyang labaha (gamit ng mga barbero) ibubuga mo ito. Syempre pa may sarili kang dalang pambalot na ginupit na puting kamisetang pinaglumaan, gugupitin mo ito ng pabilog at bubutasan mo depende sa laki ng ulo nang iyong borong-borong, ‘yun na rin ang gagawin mong panali, ginupit ng pahaba depende sa nipis o tibay.

Kapag hindi ka napuruhan ng hiwa ni Tata Pampeng eh tiyak ay umaatikabong kantyawan sa dahilan maganit na ang sa iyong “manoy” sa madaling sabi me edad ka ng magpatuli.

Sa paraan ng paglalanggas eh meron kang pinakulong dahon ng bayabas syempre pa yung kaya mong init ang ‘yun ipanghuhugas, may dinikdik kang sulpataysol o penicillin para syang ibudbud. Papalitan mo rin syempre ng panibagong balot. Iyon ang ilan araw na ritwal hanggang sa gumaling.

Nandoon din ang mga lumang paniniwala na kapag natuli ka’y bibilis kang lumaki, magbabago ang boses mo (kasalukuyan eh pinabubulaanan ng mga doktor na ang pagtuntong sa edad na onse ay talagang patungo sa estado ng paglaki at walang relasyon ang tuli). Huwag mo rin itong ipakikita sa babae- baka mangamatis (mamaga), bawal din ang kumain ng malansa laluna ang pakwan na tulad di nang naunang dahilan.

May mga pangyayari na nahihiya kang ipakita ang sa iyong tuli sa barkada o kababata dahil makakantyawan “sungaw si manoy” ibig sabihin di maganda ang pagkakatuli.

Lahat ng ito’y isang makulay na lang na alaala. Marumi na ang patubig (irrigation canal) na siya munang pagbabaran para mamanhid kahit paano si manoy. Sa malayong probinsya na lang maari ang ganitong ritwal pero maaring may nabago na rin sa pamamaraan at paglalanggas.

Ganunpaman hindi maialis na si Emman ay papasok na sa kanyang pagbibinata, na kailangan pa rin s’yang pumaloob sa isang ritwal o kulturang ating kinapalooban, na may mas malalim na pag-unawa, nang walang hibo ng pagiging makismo kundi sa katatagan ng kanyang pagkatao.

Kung magtatag nang bagong partido si Vice Pres. Noli De Castro
Kung nasa TIME 100 ng TIME Magazine si Manny Paquiao
Kung mapanganib ang H1N1 Virus
Kung di nag-alis ng sapatos si Pope Benedict XVI
Kung mabangis ang mga pirata sa Somalia
Kung hindi pa lumalayas ang tropang U.S sa Iraq
Kung mas matindi ang tama ng resesyon sa Amerika
Kung ikulong nila si Jun Lozada
Kung nagdagdag sila ng partylist sa kongreso
Kung sumayaw sila ng cha-cha, sumigaw ng con-ass (@#^)
Kung nagbayad ng kinain na burger sina Pres.Obama
Kung may Louis Vuitton na bag si Nanay Dionisia

Eh ano! Eh ano! Eh ano!

May hihigit at tatalo pa ba sa dakilang pagmamahal ng
INA?

Emanzky88
10 Mayo 2009

(c) 2009 Kwentulang Marino

“Ikinararangal ng Palasyo ang hindi mapapantayang kagitingan at paglupig sa mga kaaway. Nakatala ka na sa ating kasaysayan…”

Nagmula siya sa isang bayang mahina. Sa lupain ng mga alipin-sinakop nang ibat-ibang makapangyarihang kaharian sa Europa, Silangang Asya at Hilagang Amerika.

Kinakailangang lumaya ang bayang matagal nang binubusabos ng mga dayuhan. Sa pagdaan ng mga taon. Nakapagtatag sila ng isang maliit na kaharian. Patuloy ang mga pananakop sa mahinang bayan. Patuloy ang mga walang kawawaan digmaan.

Panahon na para magtanggol. Panahon na para lumaban. Panahon na para isabak ang napanday na mandirigma ng kanilang kaharian.Taglay ang talino, katapangan at pagka-uhaw sa kalayaan. Siya ang mandirigmang walang kinatatakutan…siya si Heneral Pacman!

Maraming laban ang kanyang dinaanan. May pakikidigmang batbat ng hirap. May pakikidigmang natapos nang madalian. Ang mga tanyag na Heneral…sina Heneral Diaz, Heneral Marquez at Heneral de la Hoya. Lahat ng mga ito’y nagdaan sa kanyang malupit na kamay. Lahat ng ito’y kanyang tinalo. Marami pang Heneral ang ibinasura ng kasaysayan sa larangan ng gyera.

Marahas ang bawat digmaan, bahagi nito ang gutom, epidemya at kamatayan. Para kay Heneral Pacman…ito ay isang misyon ng paglaya.

Alin? Iyon pinakahuling laban niya? Kinatatakutang Heneral ng Britanya-si
Heneral Hatton…
Hindi naging hadlang ang kumakalat na H1N1 Virus para sa madaliang pagpaslang kay Heneral Hatton. Sa una, minamaliit lang siya ng kampo ni Heneral Hatton, isang pipitsugin lang daw itong Heneral. Kampante silang dati pa rin istilo ng pakikidigmang gagamitin ni Heneral Pacman. Lingid sa kanila’y taktikang Spartan ang sa kanila’y nakaumang.

Nanangan sina Heneral Hatton na laging nagmumula sa kaliwa ang pwersa ni Heneral Pacman. Hindi alam ng aroganteng Heneral na kaya na rin kumumpas ang kanan pwersa…isang labanang tinapos lang ng madalian, isang labanang kahit na mga kaaway ay hindi maiwasang humanga. “Isang henyong gerero” sambit ng mga nakasaksi.

Naging bukang-bibig ang kanyang pangalan dahil sa kanyang katapangan at mga tinamong tagumpay. Ipinagmalaki siya ng lahing pinagmulan. Bawat bayan kanyang daanan ay mainit ang pagsalubong ng mga taumbayan, sinasamba gaya ng diyos ng digmaan. Maging ang mga dugong-bughaw sa ibang lupain ay labis ang paghanga at papuring ibinigay.

Dala niya ang tagumpay. Nag-uumapaw sa kasiyahang haharap sa mahal na Hari at Reyna, taglay ang pagmamalaki.

Ano’t sa kanyang paglalakbay patungo sa kanilang kaharian ay may tinanggap na kalatas mula sa Palasyo. Isang tagubilin na makapagpapabago sa kanyang buhay.

Naghuhumiyaw ang Kalatas;

Magiting na Heneral Pacman!

Ikinararangal ng Palasyo ang hindi mapapantayang kagitingan. Kahanga-hanga ang naging paglupig sa mga kaaway. Nakatala ka na sa ating kasaysayan!

Sa kabila nito, ikinalungkot naming ipaalam na pansamantala muna kayong magpalipas ng limang araw sa kaalyado nating kalapit-bayan.

Gaya nang dating kinagawian (sa bawat tagumpay ng iyong laban). Pinag-utos na wala munang mainit na pagsalubong ng ating nasasakupan at marangyang pagdiriwang. Higit sa lahat, IPINAGBABAWAL ANG PAGPUNTA SA PALASYO PARA MAGBIGAY PUGAY SA MAHAL NA HARI AT REYNA.PAGTATANKANG MAKIPAG BESO-BESO.

MAHIGPIT NATING IPATUTUPAD SA KADAHILANANG PANGKALUSUGANG KALIGTASAN NG MAHAL NA HARI AT REYNA, KABILANG NA ANG MGA TAO SA PALASYO.

LABIS ANG PAGKABAHALA NG PALASYO NA MAARING NAGTATAGLAY KAYO NG H1N1 VIRUS KABILANG NA ANG MATATAPAT NINYONG HUKBO.

Lagda,

Punong Ministro ng Payaso

Epilogue

Tahasang sinuway ni Heneral Pacman ang kautusan ng mga Payaso. Mainit siyang sinalubong ng mga mamamayan bilang buhay na bayani. Hindi na niya ninais pang siya ay parangalan sa Palasyo.

Pinag-utos ng Pandaigdigang Bantay Kalusugan (PBK) at mga kaharian,restriksyong maglakbay ang mga opisyal ng Palasyo at dugong-bughaw para mag-aliw sa ibang bayan.Total banned sa pagpasok at paglabas sa lupain ni Heneral Pacman.

Mahigpit na ipinagbawal ng kaharian ni Angkel Sam na lumapit,tumitig,makipag-kamay at bumeso kay Heneral Pacman ng mga dugong-bughaw sa Holywud.

Umani ng katatawanan,labis-labis na kasiyahan at paghanga mula sa mga makapangyarihan kaharian,internasyunal na institusyon sa maagap at matalinong desisyon ng mga Payaso sa bayan ni Heneral Pacman.

Dahil sa iniambag na kadakilaan ni Heneral Pacman.Tinawag ang kanyang bayan sa taguring “LUPAIN NG MGA PAYASO AT HENYO.”

“Mahalagang mai-transporma n’ya ang mga disiplina at katangian ng isang tunay na boksingerong magiting at dalubhasang mandirigma patungo sa larangan ng politika.”

Sa mga katandaan,pag sinabing wala kang kabusugan bata ka, eh tumupi-tupi ka na’t wala ka na sa ayos.Kumbaga hindi maganda ang dating at kung maririnig ‘yun ng nanay mo,alin na lang eh malusaw siya sa kinatatayuan.Katakot-takot na sermon,ang iyong aabutin-“para kang patay-gutom,timawa at hindi pinalalamon.Inilalagay mo kami sa kahihiyan bata ka!”

Ganitong bansag ke Manny Pacquiao na PACMAN ay angkop na angkop sa kanyang katatayuan. Sa positibong pagsilip eh wala siyang kabusugan sa paghahangad ng tagumpay, walang kabusugan sa paghahangad na maitaas ang imahe nating mga Pilipino sa mata ng mundo.

Sa hanay namin mga seaman,isa s’yang gamot sa pangungulila at hirap na inaabot sa isip at pisikal na dinaranas sa gitna ng laot. Dangal laban sa mga dayuhan opisyal na lumalait sa ating pagkikilanlan.

Iyon nga lang, sa konstruktibong pagpuna, marami din ang nag re-ak sa anunsyong siya ay muling sasabak sa pulitika. Mga komentong gaya ng “okey na s’ya sa larangan ng boksing, isa na ‘yang icon, sapat-sapat na ang tinatamasa n’yang tagumpay.”

Sabi nga,’wag mo raw equate ang iyong katanyagan sa larangan ng boksing sa pulitika. Sumagi sa aking alaala ang namayapang Bert “Tawa” Marcelo sa kabila ng kanyang katanyagan bilang sikat na artista ay natalo siya sa laban pagka-gobernador ng Bulakan.

May mga bagay na dapat pakasuriin kung bakit hindi s’ya nagtagumpay sa nakaraan n’yang laban. Argumento n’ya ay kakulangan sa preparasyon kung bakit s’ya natalo. Parang lumalabas na hindi n’ya naiitransporma ang katangian n’ya bilang isang mahusay na mandirigma. Lumalaro s’ya sa tsansya o pagbabakasakaling manalo dahil sa kanyang tinatamasang kasikatan. Isina-isang tabi n’yang persepsyon ng masa na pasapat ka na sa iyong kinalalagyan ngayon at sabi nga ng mga matatanda, magkaroon ka naman ng kabusugan amang.

Isa pa sa malaking nasisilip kong factor kung bakit hindi pa s’ya dapat lumahok sa larangan ng politika sa ngayon ay ang kawalan n’ya ng isang pirmis na desisyon, maihahalimbawa ko na ang naging isyu kung saan ipapalabas na istasyon ang kanyang laban kay Hatton, kung sa Kapuso GMA o ABS-CBN, sa huli ay humingi s’ya ng dispensa sa daplis na disposisyon.

Mahalagang mai-transporma n’ya ang mga disiplina at katangian ng isang tunay na boksingerong magiting at dalubhasang mandirigma patungo sa larangan ng politika. Habang di pa niya ito napapanday, ang paglahok n’ya dito’y pag-aanak lang ng isang lider na mabuway ang disposisyon at makakabilang lang s’ya sa mga laksa-laksang trapo, gahaman at lider na naturingan, pero walang silbi sa bayan!

Sana hindi maging padalos-dalos ang bawat unday n’ya sa muling pagpasok sa politika.

MABUHAY KA PAMBANSANG KAMAO!

Unang
araw
ng

Mayo

sa
welga
ng
RACITELCO
ay
unang
natutong
matulog
sa
malamig na
semento.

nakipag-
diskusyon
sa
buhay
pagawaan.

kapit-
bisig
na
rumagasa
sa mga
lansangan.

Unang
araw
ng

Mayo

buhos
ng
ulan
ay
hindi
nakahadlang
sa
talumpating
umuusig
sa
naghaharing iilan.

sumisigabong
palakpakan,
mga
islogang
gumuguhit
na
tila kidlat
sa
kaitaasan.

Unang
araw
ng

Mayo

nalito
ang
kataas-
taasang organo
nang
sulong na
distakamento.

paranoya
ay
kumubabaw
sa
tulirong kolektibo.

Unang
araw
ng

Mayo

mabigat
ang
kalooban.

sa
obrero

ay
napilitang

mamaalam.

Emanzky88
1 Mayo 2009

(c) 2009 Kwentulang Marino