Uhaw

Nagawang maantig ang aming kahinaan
Kinurot ang nangangarilang na kalungkutan
sa matagal na pagtakas
Bukas-palad na inihatid ng mayabang na logo
ang mga inulila sa galak
Sinilip ang mga inabandonang pugad
Pinagyakap ang mga nanlamig na dibdib
Bumalong ang dati’y natuyong luha.

Umagos ang malamig na Coca-Cola

sa mga nagbabagang bagang
sa mga nagpupuyos na lalamunan
sa mga lagablab ng galit
sa mga natigang na libog
sa mga kinuyom na hinampo
sa mga namighating okasyon
sa mga namaos na katahimikan.

Nagdudulot ng saya sa pananghalian
Masiglang sinasalubong sa bayanihan ni Juan
Kinikilala ang mga paalila’t palaboy
Lumalagok nang sangkatutak na handog.

Ano nga ba ang tunay na lasa?

sa mga pinaslang na unyonista
sa mga lumapot na pawis
sa mga pumaklang bukas
sa mga tinakam na sahod
sa mga sinaid na tubig imbakan
sa mga bumulwak na lason
sa mga winakwak na dayukdok.
.
Bihisan man ang sumpong ng Kaligayahan
Baguhin man ang timpla ng patalastas
Antigin man ang sentimentalistang walang lakas
Sa Gahamang laway ito magwawakas.

Emanzky88
4 Disyembre 2011

© 2011 Kwentulang Marino
*imahe mula sa sariling instalasyon

 

Biyaheng Asya

Ulsan

Nilango ng
maputing inuming
Soju.
Anghang ng
Kimchi
ang siyang nagpa-init
sa nanlalamig na
kalamnan,
habang binabagtas
ang nagmamalaking
daungan
at pagawaan
Hyundai.

Chiwan

Umakyat sa barko
ang sanrekwang
Opisyal na Tsino,
layun ang magsiyasat
sa dalang kargamento.
Kasabay nang pasabi
na manananghalian
ang pihikan grupo.

Sumagi sa kinalawang
na gunita.
Ang mga atas
ni Mao Zedong
na dati’y aking
dinadakila.

Belawan

Sakay ng
Pedyak
na animo
turista.
Kasabay sa
paghitit ng
Kretek,
sa kakaibang amoy
ng usok.
Lumutang ang isip
sa mga sinariwang
kuwento ni
Mochtar Lubis.
Kaguluhan sa
Jakarta
ay naganap na
sa tulang propesiya.

Emanzky88
17 Hulyo 2009

© 2011 Kwentulang Marino
*imahe mula sa Ulsan, Korea

 

Paglaya

Apatnapu’t tatlong beses
man

ipag-utos.

Anu’t amin
kang

pasasalamatan?

Sumakay
ka lang sa
pandaigdigang

pagdiriwang.

Emanzky88
10 Disyembre 2010

© 2010 Kwentulang Marino
**
imahe mula sa INQUIRER.net

 

Kuliglig sa Siyudad

Ligalig na umugong ang mga kuliglig sa siyudad. Daluyong
na humugos mula sa piping bituka ng istero. Iniluwa
ng ulilang likaw ng iskinita’t pantalan. Pilit
na binasag ng karaoke bar ang kanilang mga daing. Banyaga
ang hatid mong ingay.

Humarurot ang lagalag na himutok sa mga
pangunahing lansangan. Binusinahan
ang mga nasa poder. Nabutas ang bamban.
Gumulong ang ugong sa luklukan ni Dirty Harry. Marahas
ang nakahihilam na usok, pulandit ng tubig. Humahalik
ang latay ng baston sa nanginginig na kalamnan. Kinaladkad
ang dayong ingay sa nagmumurang semento. Ibinayo
ang kuwadradong bakal sa matigas na ulo. Hinawan
nang makapangyarihang gulong ang mga napiping makina.

Nagmadali ang mga nainip na paa. Lumipad
ang mga papeles sa malilikot na kamay. Binuhusan
nang malamig na tubig ang kalsadang inagusan nang
kumukulong dugo. Nagsalitan
umawit ang mga busina ng bus, dyip at taxi. Nanumbalik
ang katahimikan ng siyudad.

Ed Nelson R. Labao
2 Disyembre 2010

© 2010 Kwentulang Marino

**
imahe mula sa INQUIRER. net

 

Muling Ngumisi Ang Kabayo ni Bonifacio

Tinisod ang siyento beynte pesos na mapulang rosas na alay. Hanap
ang mamahaling bulaklak na may tukod. Doo’y nakasulat
mga mararangal na personahe’t samahang naghandog. Maingay
na bandang malapiyesta ang tugtog. Dagsang-tao
na hinakot ng trak, dyip at ambulansya. Sa gloryeta’t
liwasan ay hindi magkasya. Magiting
na mga kabalyerong may palong sa ulo. Pumapagaspas
ang kapa’t kumikinang na espada. Nabundat
ang mga nagsidalo sa pagkaing naka-istayro. Hindi magkamayaw
sa kaway at talumpati ang mga kakandidato.

Niliglig ng kabayo ang kanyang tulirong ulo. Nakaraang taon
pala ang pagdiriwang na hanap nito. Ginamit
lang ang kaarawan ng kanyang amo.

Ngumisi.
Ngumisi nang ngumisi.
Ngumisi.
Ngumisi nang ngumisi.
Ngumisi.
Ngumisi nang ngumisi.
Ngumising-aso ang
kabayo
ni Gat Andres Bonifacio

Emanzky88
30 Nobyembre 2010

© 2010 Kwentulang Marino

***
Ugnayan ang mga tulang ito- Pagkaawa Kay Bonifacio (2007) Nang Ngumisi Ang Kabayo ni Bonifacio (2009)
**
imahe mula sa flickr

 

Ulilang Gubat

(Kay Leonardi)

Namugto ang hamog sa malabay na dahon. Matamlay
na pumatak ang tubig sa siwang ng bato. Namait
ang malamig na inumin sa kumutim na bukal. Panaghoy
ang aninag ng buwan sa duguang damuhan. Dinilig
ng hapis ang mga katutubong ugat. Sukabang
punglo’y siyang itinudla’t sumugat.

Inulilang gubat ay muling dalawin. Sa pusod
nito’y malayang galugarin. Sa dalisdis
ay mga ilahas na halaman, bulaklak at puno. Lambing
ng payapang kamay, namanghang liwanag
at lumundag na sikdo –
masuyong hipuin, masuyong suriin. Wastong
dunong ay binyag ang pagsamo. Itanggi
sa dayuhan na lubusang ituring. Sa dakong
huli’y lubusang ariin.

Kaibigang silindro’y iluwal sa pagal na lukbutan. Haranahin
ang mga namutlang talulot. Diligin
ng matapat na berso. Binhing
pangarap na wari’y naudlot. Ituro
ang gamot sa bayang nauto.

Gunitang abo’y pananabik na ihasik ng palad. Pangakong
sa kagubatan ng Palanan-
sumanib. Yumakap.

Emanzky88
21 Nobyembre 2010

© 2010 Kwentulang Marino
***
imahe mula sa Inquirer

 

Ang Telebisyon Bilang Ilusyon

Namahika ang mga matang kumakalam
sa patawa ni Pokwang. Nilait ni
Vice ang maangas na mukha sa kubli
ng pintura. Humanga sa
nagbabagong anyo ni Angel. Sa maamong
titig ni Mateo ay tuwirang umibig. Tinubos ni
Kokey ang kalungkutan ng mga musmos. Binalisa
ang mga kinilig na puso sa kumplikadong
relasyon ni Jaime at Jewel. Binusog
nang limpak-limpak na premyo
ang mga bulsang may mapapait
na kuwento.

Mayabang ang makulay na corporate logo
sa ilang kilong bigas, pirasong sardinas
at pares ng tsinelas. Tinahi
ang mga napilas na ngiti. Binusog
ng spaghetti at chicken joy ang mga
umusling pusod. Kinalinga
ang binaboy na kalikasan. Dinalisay
nang libong paa ang agos
ng Ilog Pasig. Kinundena
ang humalong dugo sa putikan. Ipinamumukhang
panig sa katotohanan. Umaawit
ang islogan sa ngalan ng serbisyo.

Mahirap nga bang tuklasin ang virtual reality
ng isang ilusyon?
Maari ngang sa ating nakikita
ay mayroon pa tayong hindi nakikita.
Maari ngang sa ating naririnig
ay mayroon pa tayong hindi naririnig.
Maari ngang sa ipinagmamalaking huwarang
PAMILYA
ay mayroon mga anak
na hindi tinatratong tunay na
KAPAMILYA.

Emanzky88
15 Nobyembre 2010

© 2010 Kwentulang Marino

*imahe mula kay Vlad Martin

 

Sa Pulpito ng UN

Ngumiyaw nang ngumiyaw
Kumahol nang kumahol
Pumutak nang pumutak
Umunga nang umunga
Dumada nang dumada.

“Global people power. Climate change,
pandemics, terrorism and weapons of
mass destruction, transnational organized
crime such as human trafficking,
continuing vulnerability of migrants, women,
person with disabilities, and the poor…”

“The quest for universal human dignity,
RIGHTEOUSNESS PATH of compassion
and communal responsibility. This basic
principle of social justice is also the most
basic humanitarian challenge of our times…”

Ngumiyaw nang ngumiyaw
Kumahol nang kumahol
Pumutak nang pumutak
Umunga nang umunga
Dumada nang dumada.

“Many governments are tackling this
challenge, including the government
of the Philippines. Our administration’s
pledge: To channel the gains we
might reap from Public-Private Partnership
into social services like those in health,
education, and poverty alleviations…”

“And while my nation continues to
benefit from the compassion of those
who are more able to help, this does not
mean that we, or our friends in the
developing world, will be entirely
dependent on the largesse of the
developed world…”

Ngumiyaw nang ngumiyaw
Kumahol nang kumahol
Pumutak nang pumutak
Umunga nang umunga
Dumada nang dumada.

Hanggang punggok na ilong
ay humaba nang humaba.

Emanzky88
26 Setyembre 2010

© 2010 Kwentulang Marino
***
imahe mula sa google

 

IPUIPO SA PIGING

(LUNSAD-AKLAT)

Paparating na ang IPUIPO!
Mapalad na mapabilang sa kalipunan ng mga tula ang ilan sa tula mula sa KWENTULANG MARINO.
Bayaang manalasa ang IPUIPO SA PIGING!

 

P30

(Kay Anabel)

Natuliro ang isip
sa balitang umagang kay ganda
sa nabubulok na tone-toneladang
bigas sa mga NFA warehouse,
na pumalo na sa
P55
ang bentahan ng
1 kilong asukal,
na pumalo na sa
P41
ang bentahan ng
1 tintong mantika.

Kinuskos na mabuti
ang 19 na taong makaranasang katawan
ng manipis na sabon panlaba.
Kinatas ng makapal na palad
ang natitirang laman ng shampoo
para sa kanyang mahabang
itimang buhok.
Tatlong beses na psssst
ang nguso ng mumurahing pabango
sa likod ng maliit na tainga
at namumutlang pulso.

Handa na ang sarili,
para ilako ang mga nalalantang
sampaguita.
Kahit na nga abutin
ng dilim,
sa mga bakanteng garahe
sa mga bakanteng lote.

Patuloy na kumayod.
Patuloy na umindayog.
Patuloy na lamutakin
ang mga talulot.

Hindi inalintana
ang mga sumisilip
na ilaw
sa yumuyugyog
na sasakyan.
Binayaang magbigay
hugis sa mga
nanunumbat na utong.
Binayaang maghumindig
ang kanilang mga
burat.
Binayaang malantad
ang mga
nambabarat.

Bukas, muli niyang wiwiligan
ng tubig ang mga
sampaguita
na bigay-soli ng kanyang mga
parukyanong lalaki.
Baka-sakaling
may ipambili

1 Lucky Me instant mami
P7
1 San Mig 3 in 1 coffee
P5
I Tide jumbo cut
P8
1 Rejoice shampoo promo
P5
1 Modess pad sanitary napkin
P5

Suma tutal
P30.

Emanzky88
6 Agosto 2010

© 2010 Kwentulang Marino