JUSTICE KENTEX FIRE VICTIMS PIX
Mga Duguang Tsinelas
(Oda Sa Mga Manggagawa ng Kentex)

Bilang pagpupugay sa inyong kadakilaan
sa mga buhay na inialay
sa ngalan ng paggawa.

Bumili ako ng isang pares na asul na Havana
may sukat na sampung pulgadang haba
sa halagang animnapung piso
ay hindi ko tinangkang tawaran.
Tila nagyayabang ang disenyong
ribon sa plastik na lagayan

“Tsinelas ng Bayan”

Sumagi sa akin ang lupain ni Fidel Castro
ang makaysaysayang bansang Cuba
ang sentrong kapital na Havana
nagsulong ng rebolusyong Sosyalismo
may malasakit sa mga obrero

Balintuna sa tsinelas na hawak ko
nangangamoy usok ng pagkagahaman
masansang ang hangin sa lusaw na kalamnan
nakapinid ang lagusan ni kamatayan
tila mga manok na itinuring
sa alambre’y pinalibutan
kahit na nga pusa
ay hindi kayang matakasan
ng mga kalansay na nagsalansan.

Hihilab ang mga hindi natunawan
ang mga naimpatsong tiyan
sa masibang pagkamal.
Uusigin ng mga inuling na bungo’t buto
ang gabi ng bangungot
sa mga nagpabaya’t kasangkot.

Isasabit ko ang inyong
mga duguang tsinelas
sa sulok ng puso’t gunita
hihimasin ang lambot ng suwelas
ang maingat na pagbutas
patuloy na lalanghapin
sa mga makulay na dahon
ang nakaduduwal na amoy
nang pagkapabaya
patuloy kong madirinig
ang mga yapak ng panaghoy
sa isang banda
ang ngiti ng paglikhang kolektibo
sa isang produkto.

Manalig ka!

HUSTIYA ang aming ihuhugis
sa mga naulilang TSINELAS!

Emanzky88
15 Mayo 2015

© 2015 Kwentulang Marino

*imahen mula sa timesunion.com

Advertisements

Masungit ang ganti
ng lawa
Masungit ang mga
nagahamang
panginoong may palaisdaan
Masungit ang mga
sanitary health inspector
Masungit ang mga
taga BFAR
Masungit ang mga
nasa checkpoint
Masungit ang mga
nasa kapangyarihan.

Ipinagkait na makatikim
ang mga sikmurang
nalamigan

sisig
pinaksiw
kinilaw
inihaw
prito
nilaga
sinigang
sarciado
tocho
bistek
relyeno

Pinakain lang sa mga
alagang
buwaya sa Pasay
Ayaw namang
lamunin ng mga
alagang
buwaya sa Batasan
Inalibadbaran sa masansang
na amoy
ang mga nagtutulug-tulugan.

Huwag tabunan!
Huwag tabunan!
Huwag tabunan!

Kaya pang sikmurain
lalamunan at tiyang
nasanay
sa pagpag na
hinalukay.

Tone-toneladang
putaheng bangus
sa baklad ng
panaginip ay
naglutang.

Ed Nelson R. Labao
7 Hunyo 2011

(c) 2011 Kwentulang Marino
*imahe mula sa google

climate-change
Sinisigan
ang
mga
nalagas
na
gunita
sa
pagdating
ng
dapithapon.

Pinaiinin
ang
biyaya
ng
lupa

gamit
ay
tinilad
na
kahoy
nang
aking
kamusmusan.

Umaalipato
ang
nagbabagang
kalam
sa
nangingitim
na
sikmura.

Mabilis
na
dumadaloy
ang
makamandag
na
asido
sa
kumikiwal
na
mga
bituka
ng
estero.

Ibinubuga
sa
matangos
na
hininga
ang
maitim
na
usok
ng
kasakiman.

Inaalinsanganan
sa
lamig
ng
magdamag.

Binabaha
ang
nanunuyo
kong
lalamunan.

Tinutunaw
ang
bloke-blokeng
iyelo
ng
ating
kamangmangan.

Tumatagos
sa
aming
minanhid
na
kamalayan
ang
masidhing
kirot
na
gumuguhit
sa
aking
kalingkingan.

Emanzky88
12 Oktubre 2009

– litrato mula sa greenpeace.org

typhoon pepeng pdi.net(Gaya Ng Hanging Nagdaan)

Bayaang
ilublob sa
luha
ang mga
natuyong
kalansay.

Ibaon
sa putikan
ang mga naudlot
na
pangarap.

Huwag abalahin
ang mga
binangungot
na
tanod
sa labis
na
paghimbing.

Pagpistahan
ng mga
binusabos
na
mumong
hatid
ng
dayuhan.

Laruin
ng mga
konsolasyon
at
mahalimuyak
na
salita.

Maiwan
ang mga
banlik
na pilit
humahalik
sa
nakaraan.

Mangati
ang
nangangamoy
na
hampaslupang
talampakan.

Walang sumagi
sa
minanhid
na
isip.

Walang sumbat
na
marinig
sa napiping
tinig.

Bukas!

Malayang
gumagala
ang mga
hayok
na
lobo
sa masansang
na
lansangan.

Emanzky88
10 Oktubre 2009

– litrato mula sa pdi.net