Justin Bieber Selena Gomez

Miley Cyrus Lady Gaga Taylor Swift

Bela Hannah Montana Glee New Moon

OMG LOL YouTube Twitter Facebook

Ragnarok Dota Urbandub Paramore

Fliptop at American Idol!

Ngumiti.

Maingay

ang

palakpakan.

Eh…Si

Felipe “Apo Ipe” Salvador?

Nakiramdam.

Tahimik

na

nagtinginan.

Ed Nelson R. Labao

30 Marso- 15 Abril 2011

(c) 2011 Kwentulang Marino

*Bahagi nang aking talumpati sa pagtatapos sa isang pribadong hay iskul. Binigyan hugis sa istilong tula.

**imahe mula sa flickr.com

Advertisements

Tatlong gabi na ‘kong inaabala
nang paputol-putol na tulog.
Sinasalakay nang masidhing
inggit,

Yevgeny Yevtushenko!

Ano meron ka’t sinaksihan
at pinakinggan ang iyong
pagtula ng
42,000 katao?

Batbat daw ng kontrobersiya
ang iyong buhay.
Kwestyunable daw ang iyong
pampulitikang paninindigan.
Kompormista ang husga
ni Brodsky.

Pinasadahan ko
ang mga
obra ng mga dakilang
Ruso
baka sakaling sa kanila
ikaw ay humalaw
kay

Pushkin
Gorky
Turgunev
Tolstoy
Chekhov.

Yevgeny Yevtushenko!

ano ang meron ka’t
nabihag mo ang
42,000 katao?

hindi kaya sa iniinom
mong vodka na
Stolichnaya?

hindi kaya sa kinakain
mong masarap na
pelmeni?

hindi kaya sa lawa
ng iyong kamusmusan
sa lalim ng
Baikal?

Sinariwa kong muli
ang mga alaala,
tinalaktak ko
ang kahabaan ng
Deribasovskaya.
Pinagmasdan ang
kinukumpuning
Opera House.
Naglaboy sa mga museo
at parke. Tinitigan ko pa
ngang mabuti ang istatwa
ni Pushkin.
Minagdamag
nagpakalasing sa Irish Pub na
Mick O Neills. Sa inyong bayan
ko unang natikman
ang caviar.

Yevgeny Yevtushenko!

ano ang meron ka’t
nabihag mo ang
42,000 katao?

Hindi ko alam kung
ako’y nangangarap o
naalimpungatan

mukha ni Amado V. Hernandez
sa wari nakangisi’t nanunudyo,

“ hangal na makatang inggitero
lumilikha ng sining si

Yevgeny Yevtushenko

hindi sa wikang Ingles
hindi sa wikang Aleman
hindi sa wikang Espanyol
hindi sa wikang Pranses
hindi sa wikang Tsino
hindi sa wikang Filipino

sa sariling wika
umuugat, nagpupuri si

Yevgeny Yevtushenko!”

Emanzky88
29 Agosto 2010

© 2010 Kwentulang Marino

***
imahe mula sa google

Muli akong nag-alay
sa nangungulilang bantayog ni Bonifacio,
isang pumpon ng mapupulang rosas
na binalot lang sa lumang diyaryo.
Gumalaw ang kaliwang
tuhod ng kabayo.
Ang kaninang nakayukong
ulo, tumutok sa
blangkong mukha ko.

Ngumisi nang matalim ang kabayo,
sumagad sa nangitim na gilagid
umusli ang gapalakol na
ngipin, tumulo ang
kanyang malapot na laway at
nagsabing,
“humingi ka muna ng permiso
sa punong tanggapan
ng isang mataas na departamento;
hindi na daw kailangang gunitain
sa bayang ito-
kaarawan ng aking amo.”

Hindi ko maiwasang
mapakamot sa nakakalbong ulo.

Ngumisi nang matalim ang kabayo
ngumisi,
ngumisi nang ngumisi,
ngumisi,
ngumisi nang ngumisi,
ngumisi lang
ang
kabayo
ni Gat Andres Bonifacio.

Emanzky88
16 Nobyembre 2009

* Isa sa limang tula na dapat ay kalahok sa isang kompetisyon. Dala ng ilan limitasyon ay di na umabot pa sa nakatakdang petsa ng pagsusumite. Karugtong ito ng aking tula na (“Pagkaawa Kay Bonifacio”Nobyembre 30, 2007) na ipinaskil din sa Kwentulang Marino. Gunitain natin ang kanyang ika- 146 na taong Kaarawan.

(c) 2009 Kwentulang Marino
_________________________________________

imahe flickr.com

yahoo.news com

“Tahasan naming itatanggi ang mali ninyong pagtingin sa aming pagka- Pilipino…”

Sa “international community” huwag po kayong magdadalawang isip na magpadala ng donasyon sa bansa , para sa kalunos-lunos na sinapit ng aming mga kababayan sa lupit ng bagyong Ondoy.
Huwag din po kayong matakot na sa hindi mabuting kamay babagsak ang inyong donasyon, pawang paninira lang po na gagamitin lamang ito ng mga politiko o gagastusin lamang para kumain sa mamahaling restawran. Ibubulsa o ipambibili ng boto sa darating na halalan.

Wala din pong katotohanan na ito ay bunga ng kapabayaan ng gobyerno, na walang maayos na plano – tinatawag ng iba na “urban planning.” at kawalan ng disaster management plan.

Hindi rin po ito bunga ng pagbibigay pahintulot sa mga dayuhang nagmimina at walang habas na pagputol ng mga puno sa kagubatan. Polyusyon mula sa mga lokal at dayuhang pabrika.

Tahasang itatanggi din po naming kung sasabihin ninyong kaming mga Pilipino ay salahula, na kung saan-saan na lang magtapon ng mga basura, kaya ito ang sinasapit naming mga pinoy. Sa totoo lang po, ipinagmamalaki naming isa kami sa pinakamalinis na tao sa mundo. Kayo ba ilan beses ba kayong maligo sa loob ng isang araw? Kahit na nga malamig ay naliligo kami, di tulad ninyong dinadaan na lang sa pawisik-wisik ng kolon. Pasensya na po, hindi nga pala namin kayo dapat awayin.

Yung nakikita po ninyo na mga ngumingiting biktima ng Ondoy na kalahati ng katawan ay nakalubog sa baha at nakukuha pang magtawanan at magkantyawan, likas na po sa amin iyon. Anuman ang dumating sa aming bagyo, lindol, at salot ay kaya naming harapin. Hindi naman kami gagaya sa mga kapatid naming Asyano na simple lang problema o kahihiyan ay para ng sinukluban ng langit at lupa. Kadalasan pa e nagpapatiwakal ang marami. Ano kami bale?

Baka sabihin din ninyong mababaw ang kaligayahan naming mga pinoy, na komo artista lang o politiko ang namimigay ay madali na naming malimutan at mapatawad kung sino talaga ang may kagagawan ng trahedya. Okey lang po sa amin na mamigay sila. Nakamayan ko nga po si Dingdong Dantes at Marian Rivera, sa totoo lang po tanggal ang pamumulikat ng aking bewang at pangangati ng alipunga sa aking paa. Hindi ko nga po napigilang tumili at kunan ng
litrato ang mga iba pang artista. Napapasalamat nga din kami sa mga politikong namigay ng relief goods mula sa mga lalaban sa pagka-presidente mula kay Erap, Villar, Noynoy hanggang sa lokal na kandidato. Talagang trak-trak kung dumating ang mga donasyon. Okey lang po kahit sabihin ng iba na ginagamit lang kami para sa kanilang popularidad.

Wag din po kayong maniniwala na hindi tumulong ang mga tropang Amerikano. Katunayan nga po, kung sabado nanalasa si Ondoy, linggo na po ng ala una ng hapon rumesponde sila. Yun nga lang po inaasahan ko sana na ipapakita nila yung galing nila sa mga Balikatan exercise, na kahit malakas ang alon ay nakasakay sila sa isang rubberboat na animo dadagitin ang kanilang ililigtas at ilalayo sa panganib. Ewan ko rin kung nagamit nila yung mga helicopter na parang tulad din ng eksena sa Hollywood na kukunin sa bubungan ang biktima. Ganunpaman payag pa rin akong manatili sila dito sa pinas kahit na nga kwestyunin ng iba ang pananatili nila dito. Sila pa rin ang hero ko sa matagal na panahon.
Speaking of rubber boat, di po totoo na dalawa lang ang ginamit ng mga nag- reskyu sa Marikina. Marami pong stock na rubber boat dito sa pinas, lahat po ng ahensya ng gobyerno meron dito.
Kahit nga po sa kongreso, senado mero din po. Syempre pa maging sa palasyo, kasi naman malapit yun sa Ilog Pasig. Uulitin ko po rubber boat hindi po mga bundat na tiyan, baka po kasi magkanriringgan kayo.

Huwag din po kayong padadala sa balita na kaya malungkot ang mukha ni Kuya Gibo at Ate Glo ay na – guilty sila. Iyon po ay manipestasyon ng pagmamahal at malasakit sa aming mga pinoy.

Kung nakita man nga pala ninyo si Jessica Soho nung gabi ng sabado na parang me tinig nang kawalan ng pag-asa at yung reporter nilang si Susan Enriquez na mangiyak-ngiyak eh pagpasensyahan na po ninyo at naging emosyunal lang sila. Hindi nila dapat ipinakikita sa t.v yung tunay nilang damdamin. Dapat maging manhid este matatag sila gaya ng mga namumuno sa bansa.

Kasinungalingan din po na sabihing makasalanan na kaming mga pinoy kaya sinisingil na kami sa itaas o pagpaparamdam lang na malapit na ang paghuhukom. Kami ang pinakauna o tagapagtaguyod ng Kristiyanismo dito sa Asya. Narito din ang mga ibat-ibang kongregasyon. Matatag ang simbahang katoliko, INC, JIL, El Shaddai, kaya nga di makalusot-lusot yun kung anu-anong bill. Di pwede sa amin- pag nakasalang na eh moralidad naming mga pinoy.

Sa kabila nito eh kaya naming harapin ang mga pagsubok. Kaya naming bumangon. Isa lamang paghamon ito sa aming katatagan. Kahit na nga sabihing matiisin kami, iba ang Pinoy!
Mahalaga ay kung paano kami manalig sa dakilang lumikha at sa mga namumuno sa aming bansa. Uulitin ko, Tahasan naming itatanggi ang mali ninyong pagtingin sa aming pagka- Pilipino.

– litrato mula sa news.yahoo.com

5680_112377772766_101164622766_2138294_3550545_n1

Nag istrol

sa

Trinoma

si

Mabini

hindi

nasiyahan ay lumipat

sa

SM City

Gustong kumaing

ni

Marcelo H. del Pilar

sa

Mc Donald’s

may padalang alawans

ang kanyang anak

Tumangging sumama

si

Dr. Jose Rizal

mas gusto niya

sa

Jollibee

langhap pinoy kasi

Buong

giliw na ipinagmalaki

ni

Mariano Ponce

sa bayang

Baliuag

ay may katatayu lang

na

SM City

Reklamo

ni

Andres Bonifacio

ay hindi man lang maalayan

ang kanyang

rebulto

Sabad

ni

Felipe “Apo Ipe” Salvador

mabuti pa nga kayo

apo ko na ang naging mayor

dito

kahit kapirasong

monumento

ay walang naitayo

sa

ngalan

ko

2

Gumimik

ang mga

ilustrado

sa pamumuno

ni

Aguinaldo

niyabangan ang mga

propagandista at rebolusyunaryo

sa

fastfood lang daw

kayang

kumain ng mga ito

sa

mamahaling

restawran

na

Le Cirque

ang pasiklab

ng

grupo

kabuntot si Paterno Quezon Laurel

at

Roxas

Sa dami ng nakaing

Caviar

malaki ang kanilang

babayaran

Huwag kayong matigagal

sigaw nitong

si

Macapagal

magkano ba ang

suma-tutal?

beynte mil dolyares

lang naman

buong pagmamalaking

binayaran

3

Gran aybol ang tropa

pinaghalong rebolusyunaryo repormista elitista

Naaliw

sa ibat-ibang nakita

maraming ngumangawa sa

kalsada

patay na pala

si

Michael Jackson Francis Magalona

Bakit

lumulutang ang kulay dilaw

sa

Ayala

tanong

ni

Ninoy

sa mga kasama

Sagot

ni

Diokno

sa kulungan ay kanyang

kakosa

Libing

ni

Cory

na iyong asawa

Ganyan lang ang mga

pinoy

sa una

bukas makalawa ay wala na

Sumaya

ang mga indiyo at ilustrado sa

ibat-ibang

anunsyo

sumayaw at kumanta

si

Buboy Syjuco

ng

TESDA

nabigyang buhay

ang

apelyido

ni

TEODORO

tigapag alaga

lang

pala ng baboy

si

Binay

naawa sila sa

bubungang

butas na bahay

ni

Villar

ipinakita namang

PUNO

ay walang bunga

kahit ni isang bubot na

mangga

napailing

si

Manuel Roxas

sa pagsikad ng trayk

ng kanyang

apong

si

Mar Roxas

tumakbo nang matulin

si

Erap

salamat sa gamot

na

Arthro

hindi naman sila nakaligtas

sa sermon

ni

Miriam Santiago

4

Eksposyur tayo sa

BASECO

ang kayag

ni

Lean Alejandro

tumango lang sina

Jopson Beltran Olalia

tinanong

ang masa

kung payag na sumawsaw

si

Satur at Casiño

sa

Nacionalista

buweltang

sagot sa kanila

bakit

wala bang sariling

partido

ang

kilusang masa?

sino

ang kilala ninyong

mga

bayani?

(may gantimpala kayong nakatabi!)

Lucky Me Noodles 3 in 1 Nescafe UFC Sarsarap Ulam king

Lotto ticket Nokia Celfon Unli Text

Trip to Boracay

BAYANI?

GMA FG Garci Abalos Neri Ermita Remonde Claudio

Bolante Mancao Romualdez Suarez

CBCP El Shaddai Ombudsman AFP VFA

Senado Kongreso COMELEC

Darna Rosalinda Hayden Kho Revillame

Eat Bulaga Wowowee Payaso EDSA People Power

ZTE Stocks Cha-Cha Con-Ass

Steak Red Wine Caviar Astoria

BAYANI?

pasensya na po

hindi

naming talaga kayo

kilala

madali kayong

mawala

sa aming

memorya.

Emanzky88

28 Agosto 2009

*** Nalathala sa antolohiyang IPUIPO SA PIGING (2010)

250px-Php_bill_500_front

” The Filipino Is Worth Dying For ”
– Benigno S. Aquino Jr.

Ikaw ba iyong
kaaway
ni
Marcos?

Ikaw ba iyong
binaril
sa
tarmac?

Ikaw ba iyong
tatay
ni
Kris?

Ikaw ba iyong
ipinalit
na
ngalan
sa
Manila International Airport?

Ikaw ba iyong
inilagay
sa
limandaang piso?

Ikaw ba iyong
nakasalamin
at
may
ibon
sa maraming
rebulto?

Ikaw ba iyong
ipinalit
na
pangalan
sa
Marcos Avenue?

Ikaw ba iyong
asawa
ni
Cory,
nais
ding
ilagay ang mukha
sa
pera,
idiklarang pambansang
bayani
at gawing santa?

Ikaw
pala
‘yun…

Ikaw
pala
si
Ninoy!?

Emanzky88
21 Agosto 2009

Ilan taon na kitang pinapansin
tuwing sasapit ang a-treynta
ng nobyembre,
wala man lang
bulaklak
sa iyong rebulto.
tanging memorya’y
ang paglipat-lipatin ka,
sa iyong pwesto.
hindi ka ba nahihilo
o kaya’y nalilito?
hindi ka ba
naninibugho
kay Rizal at Ponce,
may alay ng bulaklak
sa programa ay kumpleto
rekado?
may hinanakit ka ba
kay mayor,
sa mga taong
munisipyo
samahang pangkasaysayan
at mamamayan ng bayan
ko?

Ipagpatawad
handog na isang pumpong na
rosas
sa ibabaw ng ‘yong
monumento.
sa palengke’y binili,
ibinalot lang sa
diyaryo.
huwag mong isiping
labis ang pagkaawa
o nakonsensya
sa kalagayan mo.
maaring kabaligtaran
pa nga ito.

Titindig ka nang may tikas
ipagsisigawan!
hindi ikaw ang tunay na
biktima,
kaawaan nang todo.
bagkus, kaming hindi
nakaunawa sa
tunay
na kasaysayan…1896
Rebolusyong Pilipino!

Emanzky88
30 Nobyembre 2007

© 2008 Kwentulang Marino
________________________________________

imahe flickr.com