Agosto 2011
Monthly Archive
Agosto 30, 2011
Silang mga walang
mukha. Silang mga
nawawala. Naglaho na
ang mga determinadong mata. Naglaho na
ang mga mapambuskang ngiti. Naglaho na
ang buong PROFILE. Naglaho na
ang buong WALL. Naglaho na
ang buong ALBUM. Naglaho na
ang piling LINK. Naglaho na
ang paboritong VIDEO
Inipit
na mag-POST
Binusalan
na mag-COMMENT
Binulag
na mag-PM
Pinipi
na mag-CHAT
Ipinagkait
na mag-TAG
Pinagdamot
na mag-LIKE.
Tinortyur
ng mga katagang
Surveillance Unfriend Block
Spam Hide Trash
Delete.
Nangungulila.
Emanzky88
30 Agosto 2011
©2011 Kwentulang Marino
Agosto 27, 2011
Gandang Lansangan
Oda kay Camila Vallejo
Natunaw ang mayabang na niyebe
sa alab ng talumpati. Humugos
ang liyab palabas ng tarangkahan. Sumirit ang
kariktan sa entablado ng lansangan. Rebolusyon
ang nakatitik sa pamabat na alampay. Ibang-iba
sa ordinaryong patimpalak. Marunong
yumakap sa mga anak ng siyudad. Inimbak
ang mahapding luha sa mga basyong lata. Kinorteng
panawagan noong dekada ’70. Alitaptap
ang mga ibinatong botelya. Umaagos
ang puyos sa anim na daang libong kapos. Tumaginting
ang mga tinidor at kutsara na
inihagis sa hayok na abenida. Batingaw
na kumalembang ang mga kaserolang ampaw. Naihi sa
pundiya ang mga nasa luklukan. Kinupasan
ng libog si Sebastian Piñera. Ay Camila!
Arkitekto ng protesta.Tunay kang
hinulma sa mga tula
ni Pablo Neruda.
Emanzky88
27 Agosto 2011
© 2011 Kwentulang Marino
Agosto 24, 2011
Doble Insulto
kay Hen. Gregorio del Pilar
Akala siguro
palitan man o pinturahan
Hamilton
ay pangalang hindi mawaglit.
Inukit sa lumutang na lapida ng dahas. Buhusan
ng tubig alat ay walang makabubura sa
bunton galit ng Vietnam. Sa kanyang
kasuklam-suklam na giyera.
Akala siguro
sa retoke ay maikubli. Halos kalahating siglo
tanda ng barko. Daungan ay junkshop
doo’y idestino. Mangilong bakal
ay huwag sa aming ikalakal. Sukli ay
kinalawang na dangal.
Akala siguro
matutuwa ang mga ginagong Filipino. May pantapat
na daw sa sopistikadong Tsino. Mayabang na
umakyat ang bagong pangulo. Ibinando ang
bagong barko na segundamano.
Akala siguro
nitong mga hinduropot. Baliw na
ang bayan sa istoryang Koreano. Lagi na lang ba
nababagok ang ulo?
Malinaw pa sa makintab mong noo
Malinaw pa sa Dagat Pasipiko
Malinaw pa sa usig ni Diokno
Tropang Amerikano
pumaslang, nagnakaw
bumaboy sa bangkay
nang magiting na
batang heneral!
Emanzky88
24 Agosto 2011
© 2011 Kwentulang Marino
imahe mula sa google
Agosto 21, 2011
Utenanyo
(sa mga diyus-diyosan)
Nanggagalaiti
ang marahas
na tulisang kamay
pilit
na binali
ang naghuhumindig
na burat
binabaluktot
ang litid
ng katotohanan
nagbanta
ang lagablab
sa iwinisik na tamud
binuntis
ang mga binaog
na panata
umusbong
sa
ilong
noo
pisngi
batok
tainga
dila
iniluwal
ang sandamukal
na mga diyus-diyosan
winasiwas
ang umuusok na
insenso
sa mga kampon
ni Mideo
‘sang linggong
pagsisisi!
magwawakas
ang kanyang
libog
na kapangyarihan
sa liyab
nang libong sigaw
silaban
ang mga tarugo
banal na abo
ay ekis
na iguhit
sa noong tinampal
nang kabalbalan
nang kabanal-banalan
mula sa
banal
na angkan
ni
Ba’al.
Emanzky88
17 Agosto 2011
© 2011 Kwentulang Marino
*Pasubali: Huwag basahin kung hindi bukas ang pag-iisip, may ibang paniniwala, interpretasyon. Maselan ang larawan at paksain ng tula
imahe mula sa Poleteismo
ni Mideo Cruz
Agosto 13, 2011
Diyus-diyosan
kay Mideo
Lumuhod ang mga banal sa
luklukan ng sining.
Nasuklam sila sa tumingarong
uten
sa butas na condom
na binayubay sa krus.
Hindi lang
medyo.
Sinanibang tutoo
si Mideo
kampon ng
dimonyo.
Paulit-ulit
na usal.
Paulit-ulit
na dasal.
Tahasang itinanggi
hindi namin
dinidiyos si Gloria
hindi namin
dinidiyos si Obama
hindi namin
dinidiyos ang Tsina
hindi namin
dinidiyos ang mga asendero
hindi namin
dinidiyos ang mga milyunaryo
hindi namin
dinidiyos ang mga politiko
hindi namin
dinidiyos ang mga obispo
hindi namin
dinidiyos ang PCSO
hindi namin
dinidiyos ang lotto
hindi namin
dinidiyos ang huweteng
hindi namin
dinidiyos ang Porsche
hindi namin
dinidiyos ang Montero
hindi namin
dinidiyos ang Raven
hindi namin
dinidiyos si Justin Biever
hindi namin
dinidiyos ang Eat Bulaga
hindi namin
dinidiyos ang Willing-willie
hindi namin
dinidiyos ang Manny many prizes
hindi namin
dinidiyos ang Korean telenobela
hindi namin
dinidiyos ang St. Luke
hindi namin
dinidiyos ang Jollibee
hindi namin
dinidiyos ang instant noodles
hindi namin
dinidiyos ang pagpag
hindi namin
dinidiyos ang celfon
hindi namin
dinidiyos ang Facebook
hindi namin
dinidiyos ang mga anarkista
hindi namin
dinidiyos ang mga rasista
Mideo!
hindi kami ipokrito
hindi kami pagano
sumasamba lang kami
sa gintong toro.
Emanzky88
11 Agosto 2011
© 2011 Kwentulang Marino
*imahe mula kay Mideo cruz
Poleteismo
Agosto 11, 2011
Pintig ng Alon
(Oda sa Marino)
“I don’t like being stationary
I like the rocky wavy motion of the sea.”
– Tracy Chapman
I Used To Be A Sailor
Pumintig
ang aligagang
puso
sa himig ng
lakbayin.
Ginagalugad ang bawat
daungan
humihimbing sa maamong
kandungan.
Gumagaod nang makukulay
na kuwento
binbuksan ang pintuan
sa mga
bagong mukha.
Ipinipinid
ang mga
kabinang luma.
Pinatatangay sa
agos
isinuka mga
multong iginapos.
Hindi tuwirang
naghilom
tagas ng langis
sa madungis
na ngumangang makina.
Pasakan man pilit
nang puting istupa
bubulwak ang kanyang
nasa.
Balisa ang mga
alon
humahampas sa tinakasang
kahapon.
Walang tiyak na
rombo
sa nalilitong sukat
ng kasalukuyang
hanap.
Higit na pinabigat
ng kargamento
sumasalakay
na tone-toneladang
argumento.
Bagaheng puno nang
panaginip
matibay na kalasag
laban sa piratang-pating
sa dagat ng
Somalia.
Maging ang traydor na latigong
buhos ng tubig
sa look ng
Biscay
ay hindi magawang
bangungutin
ang kasungitan ng
magdamag.
Mapabibilis ba ang
sikdo
ng mga
kataga
para mapasaya
ang
pagsagwan?
I. Tagapaghatid ng kuwentong-biyahe
M/V Clipperventure-L
M/V Akra Sounion
M/V Maasslot-L
II. Kanlungan ng talihanga’t mga gunita
Odessa
Buenos Aires
Lisboa
Houston
Amsterdam
Belawan
Kuantan
Cairns
Barcelona
San Nicolas
Honiara
Pontianak
Tuxpan
Kobe
Ulsan
Panama Canal
Hamburg
Algiers
Panganiban
III. Iba-ibang kulay. Iba-ibang mukha ng buhay
Mrs. Nuygen
Ioanni Sapountsis
Alexander
Viktor Novotny
Julie Nuygen
Luda
Erni Setiawati
Dr. Angel Pereira
Penny Soh
Yao Shi Hong
Na Thokuntot
Maria Ascensao de Sousa
Fr. Avel
Pinoy sa Sabah
Hsu Lan
Esther Bravo
IV. Samu’t saring bagay na ibayong nagpatibay
The Rime of the Ancient Mariner
Literary Museum
Paradiso
Caviar
Parola
Hong Kong Bar
Kimchi
ITF
Houston Seaman’s Center
Sex Museum
Gloria Trevi
Tequila
Carlos Bulosan
Russian bible (1898)
Lenin
Greek coffee
Federico Garcia Lorca
Village Voice
Charlie’s Bar
Parker’s
Fetah cheese
Rashomon
Kretek
Joey Ayala
Vintage photo
Lualhati Bautista
Pablo Neruda
Sinisid
ang
laot
ng
mga
kataga.
Pintig
ay
nilagom
sa sinapupunan
ng
karagatan.
Para
sa
panibagong
biyahe
ng
mga
alon.
Emanzky88
5 Oktubre 2008
© 2011 Kwentulang Marino
imahe mula sa google
Agosto 5, 2011
Nagsanib puwersa
na sina
Jorge at Manny.
Binagong pangalan ay inihantad
sa dinaklot na
lambong.
Sigaw
ay nagwawala sa
tanghalan
ng aliw.
Panaginip
si Kobe
ganap na mayakap.
Sa dribol
pa lang
hininga ay nagkabuhol- buhol.
Halik
sa dama ni Venus
pananabik
ang hangad.
Akala
mo’y itik
kung sila ay
lumakad.
Brgy. Pangarap
may alyansa ng
panaghoy.
Kadamay
ay dugong pinadaloy.
Buong-puso
na pinabukal sa
adhika-
Mel at Sol.
Bangkay
na haliging kahoy
dinding na
karton
mga latang bubong
sa ulilang estero
ngayon ay
nakaburol.
Kamkam
ay kokak ng
palakang Araneta.
Ganting
bigwas ng katarungan.
Higit pa
sa nagngangalit
na
barikada.
Emanzky88
23 Hulyo 2011
©2011 Kwentulang Marino
***imahe mula sa google